बुधबार राष्ट्रियसभाको बैठकमा बोल्दै सांसद ठाकुरले वर्तमान सरकार जनअपेक्षा अनुरूप काम गर्न असफल भएको दाबी गर्नुभयो। उहाँले सरकारले जनतालाई गरेका अधिकांश प्रतिबद्धता पूरा गर्न नसक्दा देशमा निराशा बढेको टिप्पणी गर्नुभयो।

सांसद ठाकुरले प्रधानमन्त्री साहले कर्मचारी प्रशासनमाथि अनावश्यक हस्तक्षेप गरेको, दरबन्दीका कर्मचारी हटाएर प्रशासनिक अस्थिरता सिर्जना गरेको तथा राजनीतिक दलका कार्यालयमाथि हस्तक्षेप र तोडफोडजस्ता गतिविधि बढेको आरोप पनि लगाउनुभयो।

उहाँले सरकारको कार्यशैलीका कारण राजनीतिक दलका नेता, व्यवसायी तथा विभिन्न क्षेत्रका सरोकारवालामा असुरक्षाको भावना बढ्दै गएको दाबी गर्दै शिक्षा र स्वास्थ्य क्षेत्रमाथिको कडाइले लाखौँ विद्यार्थी, शिक्षक तथा स्वास्थ्यकर्मी प्रभावित हुने चेतावनी दिनुभयो।

बैठकमा बोल्दै सांसद ठाकुरले, “सरकारले लोकतान्त्रिक मूल्य–मान्यताभन्दा बाहिर गएर शासन गर्न खोजेको देखिन्छ। प्रधानमन्त्री जो बोल्नुहुन्छ त्यही कानुन र जो गर्नुहुन्छ त्यही सही भन्ने प्रवृत्ति देखिएको छ,” भन्दै सरकारको कार्यशैलीप्रति गम्भीर प्रश्न उठाउनुभयो।

उहाँले निजी विद्यालय, नर्सिङ होम तथा विभिन्न पेशागत संगठनमाथि भइरहेको सरकारी नीतिको पुनर्विचार गर्न सरकारसँग आग्रह गर्दै लोकतान्त्रिक पद्धति र विधिको शासनलाई बलियो बनाउनुपर्ने आवश्यकता औंल्याउनुभयो।