काठमाडौं, साउन ३ । फिफा विश्वकप २०२६ को फाइनल खेलका लागि कडा सुरक्षा व्यवस्था गरिएको छ ।

अमेरिकी राष्ट्रपति डोनाल्ड ट्रम्प आइतबार राती हुने फिफा विश्वकप फुटबलको फाइनल खेलमा उपस्थित हुने भएसँगै सुरक्षा व्यवस्था कडा पारिएको आयोजक फिफाले जनाएको छ । स्पेन र अर्जेन्टिनाबीच हुने उपाधि भिडन्तपछि राष्ट्रपति ट्रम्पले ले फिफाका अध्यक्ष जियानी इन्फान्टिनोसँग मिलेर विजेता टोलीलाई ट्रफी प्रदान गर्ने कार्यक्रम रहेको छ ।

अमेरिकाको न्यूयोर्कको न्यू जर्सीमा हुने उक्त फाइनल ट्रम्पले प्रत्यक्ष अवलोकन गर्ने पहिलो विश्वकप खेल हुनेछ । राष्ट्रपति ट्रम्पले यो विश्वकपलाई अहिलेसम्मकै सबैभन्दा सफल प्रतियोगिता भएको दाबी गर्नुभएको छ । प्रतियोगिताले अमेरिकामा फुटबलप्रतिको आकर्षण र लोकप्रियता बढाएको पनि उहाँको भनाई छ ।

ट्रम्पसँगै प्रथम महिला मेलानिया ट्रम्प, उनका छोरा ब्यारन ट्रम्प तथा मेलानियाका पिता भिक्टर नाभ्स पनि फाइनलमा उपस्थित हुने जनाइएको छ । त्यस्तै, स्पेनका प्रधानमन्त्री पेड्रो सान्चेज तथा स्पेनी राजपरिवारका सदस्यहरू पनि फाइनल हेर्न पुग्ने आयोजकको भनाई छ ।

यस्तै प्रतियोगिताको सहआयोजक राष्ट्र मेक्सिकोकी राष्ट्रपति क्लाउडिया शिनबाम र क्यानडाका प्रधानमन्त्री मार्क कार्नी पनि फाइनलमा सहभागी हुने कार्यक्रम छ । न्यू जर्सीस्थित रंगशालावरपर कडा सुरक्षा व्यवस्था मिलाइएको छ । उहाँ आउने समय रंगशाला आसपासको हवाई क्षेत्रलाई अस्थायी रूपमा ‘नो–फ्लाइ जोन’ घोषणा गरिने जनाइएको छ ।

बिश्वपकमा ट्रम्पको भूमिकाले यसअघि नै विवादसमेत निम्त्याएको छ । अन्तिम १६ चरणअघि अमेरिकी स्ट्राइकर फोलारिन बालोगुनमाथिको रातो कार्ड फिर्ता लिन वा निलम्बन गर्न आग्रह गर्दै ट्रम्पले फिफा अध्यक्ष इन्फान्टिनोलाई फोन गरेको समाचार सार्वजनिक भएको थियो ।

ट्रम्पले दोस्रो कार्यकालका लागि ह्वाइट हाउस फर्किएयता फिफा अध्यक्ष जियानी इन्फान्टिनोसँगको सम्बन्धलाई थप प्रगाढ बनाउनु भएको छ उहाँले विश्वकप र सन् २०२८ को लस एन्जलस ओलम्पिक आयोजना गर्ने अधिकार अमेरिकाले प्राप्त गरेको विषयलाई आफ्नो उपलब्धिका रूपमा उल्लेख गर्दै आउनु भएको छ ।

यसअघि न्यु जर्सीमै आयोजित फिफा क्लब विश्वकपको उपाधि वितरण समारोहमा ट्रम्पले ट्रफी हस्तान्तरणपछि पनि विजेता टोलीसँगै मञ्चमै बसेको घटनाले चर्चा पाएको थियो । पछि उहाँले उक्त ट्रफी ह्वाइट हाउसमा राखिएको दाबी गर्नुभएको थियो ।

तर, फिफाले ह्वाइट हाउसमा रहेको ट्रफी सक्कली नभई प्रतिकृति (रेप्लिका) भएको स्पष्ट पारेको थियो । बिश्वका फुटबल प्रेमीको प्रतिक्षाको घडीका रुपमा रहेको फाइनल खेल आइतवार राती नेपाली समयअनुसार १२ः४५ बजे सुरु हुनेछ ।