काठमाडौं, भदौ १० । राष्ट्रपति रामचन्द्र पौडेलले प्रधानमन्त्री बालेन्द्र शाह (बालेन)सँग फोन संवाद गर्दै रसुवाको भोटेकोशी नदीमा आएको बाढीबाट प्रभावितको उद्धार, खोजी तथा राहतमा राज्यका सबै संयन्त्र परिचालन गर्न आग्रह गर्नुभएको छ।

राष्ट्रपति पौडेलले फोनमार्फत भोटेकोशी बाढीको पछिल्लो अवस्था तथा बाढीमा परी बेपत्ता भएकाहरूको खोज तथा उद्धारबारे प्रधानमन्त्री शाहसँग जानकारी लिनुभएको हो।

राष्ट्रपतिका प्रेस सल्लाहकार किरण पोखरेलका अनुसार राष्ट्रपति पौडेलले बाढी प्रभावितको उद्धार, खोजी तथा राहत कार्यमा कुनै कमी हुन नदिन राज्यका सबै संयन्त्र परिचालन गर्न प्रधानमन्त्रीलाई आग्रह गर्नुभएको छ।

वार्ताका क्रममा प्रधानमन्त्री शाहले बाढीबाट भएको जनधनको क्षतिबारे राष्ट्रपतिलाई जानकारी गराउँदै विपद्मा परेकाहरूको उद्धार, राहत तथा सहयोगका लागि सरकारका सबै संयन्त्र परिचालन गरिएको बताउनुभएको छ।

प्रभावितको उद्धार तथा राहतका लागि हरसम्भव प्रयास भइरहेको र त्यसमा कुनै कमी हुन नदिने प्रतिबद्धता प्रधानमन्त्री शाहले जनाउनुभएको प्रेस सल्लाहकार पोखरेलले जानकारी दिनुभयो।