काठमाडौं, कात्तिक ५ । दसैँको खुसी साट्न माइती आएकी चेलीको जीवनमा यस्तो बज्रपात पर्‍यो, जसले एउटा परिवारको खुसी एकैछिनमा शोकमा बदलिदियो। छोरीसँगै दसैँ मनाउन माइती पुगेकी सिन्धुलीकी सतीदेवी कोइराला छोरीलाई बचाउने प्रयास गर्दा आफैँले पनि ज्यान गुमाउनुपरेको छ।

सिन्धुलीको सुनकोशी गाउँपालिका–१ आपघारीस्थित क्रसर उद्योगका लागि प्रयोग गरिएको पानी पोखरीमा डुबेर सतीदेवी र उनकी छोरीको मृत्यु भएको हो। सतीदेवी स्थानीय बद्रीप्रसाद कोइरालाकी जेठी छोरी हुन्।

प्राप्त विवरणअनुसार, दिउँसो करिब २ बजे आमा–छोरी पोखरीमा नुहाइरहेका थिए। त्यही क्रममा खेल्दै गरेकी बालिका पोखरीमा डुबिन्। छोरी डुबेको खबर सँगै रहेका साथीबाट पाएपछि उनलाई बचाउन सतीदेवी पनि पोखरीमा पसिन्। तर, छोरीलाई बचाउने प्रयासमा उनी आफैँ पनि डुबिन्। अन्ततः दुवैको ज्यान गयो।

दसैँ मनाउन माइती आएकी छोरी र नातिनीको एकैसाथ मृत्यु भएपछि परिवारमा बज्रपात परेको छ। चाडपर्वको उल्लासबीच घरमा भित्रिएको यो शोकले परिवारका सदस्यसँगै स्थानीयवासीलाई समेत स्तब्ध बनाएको छ। जुन घरमा दसैँको खुसी छाउनुपर्ने थियो, त्यहीँ अहिले असह्य पीडा छाएको छ।

आफ्नो सन्तानलाई बचाउन आमाले गरेको अन्तिम प्रयासले घटनालाई थप मर्माहत बनाएको छ। एकै घटनामा आमा र छोरी दुवै गुमाउनु पर्दा परिवारले भोग्नुपरेको पीडा शब्दमा व्यक्त गर्न कठिन छ। घटनाबारे प्रहरीले क्रसर उद्योगका सञ्चालकहरूमाथि अनुसन्धान गरिरहेको जनाएको छ।