काठमाडौं, कात्तिक ९। तेस्रो संस्करणको नेपाल प्रिमियर लिग (एनपीएल) मा साविक विजेता लुम्बिनी लायन्सले विजयी सुरुवात गरेको छ।

आज सम्पन्न खेलमा लुम्बिनीले सुदूरपश्चिम रोयल्सलाई ७ विकेटले पराजित गरेको हो। सुदूरपश्चिमले दिएको ८८ रनको लक्ष्य लुम्बिनीले ९.५ ओभरमा ३ विकेट गुमाएर पूरा गर्‍यो।

लुम्बिनीको जितमा डार्सी शर्टले आक्रामक ब्याटिङ गर्दै १८ बलमा ४ चौका र ३ छक्कासहित ४० रन बनाए। आसिफ शेखले ३२ रनको योगदान दिए। बलिङतर्फ सुदूरपश्चिमका अनिल खरेलले २ तथा दीपेन्द्र सिंह ऐरीले १ विकेट लिए।

त्यसअघि त्रिवि क्रिकेट मैदानमा टस हारेर पहिले ब्याटिङ गरेको सुदूरपश्चिम १७.२ ओभरमा ८७ रनमै अलआउट भएको थियो।

सुदूरपश्चिमका लागि दीपेन्द्र सिंह ऐरीले २७, अनिल खरेलले अविजित १५ र सैफ जैबले १३ रन बनाए। अन्य ब्याटरले दोहोरो अंकमा रन बनाउन सकेनन्।

सुदूरपश्चिमलाई सस्तैमा समेट्ने क्रममा लुम्बिनीका किशोर महतोले ४ तथा शेर मल्लले ३ विकेट लिए। शेड्ली भान शाल्कविक, तिलक भण्डारी र रोहित पौडेलले समान १ विकेट हात पारे।