पर्सा, साउन २६

कोरोना भाइरस (कोभिड–१९) को संक्रमितको उपचार गर्दागर्दै नारायणी अस्पतालका चिकित्सक नर्स तथा अन्य स्वास्थ्यकर्मी समेत गरी ४५ जना संक्रमणमा परेका छन् । ठूलो संख्यामा स्वास्थ्यकर्मी नै संक्रमणमा परेपछि नारायणी अस्पताल सिल गरिएको छ ।

तर, आइतबार दिउँसो स्थानीयको एउटा समूह आयो, जवरजस्ती अस्पताल भित्र छिर्‍यो, आकस्मिक कक्ष तोडफोड गर्‍यो, उपचारमा खटिएका चिकित्सकको पार्किङ गरेर राखेको गाडी फुटायो र चिकित्सक विरुद्ध चर्का नाराबाजी गर्‍यो । सोही समूहले मेडिकल सुपरीटेन्डेन डा. मदनकुमार उपाध्यायलाई कालोमोसो दल्ने भन्दै खोजी समेत गर्‍यो, भाग्यबस डा. हुलदंगा गर्ने समूहबाट जोगिनुभयो ।

नारायणी अस्पतालले आफ्नो मातहतमा लिएर चलाएको गण्डक अस्पतालको कोभिड–१९ टिम संयोजक डा. उदयनारायण सिंहको गाडी भने जोगिएन्, सिसा फुटाइए । ‘हामीले त रातदिन आफ्नो ज्यानको पर्वाह नगरी सेवा दिएका थियौँ तर त्यसबापत हामीमाथि नै हातपात र कालोमोसो दल्ने भन्दै भिड आइपुग्यो । यसले कोरोना विरुद्धको युद्धमा कसरी बिजयी हुन सकिएला ? ‘ नारायणीका मेसु डा. उपाध्यायले भन्नुभयो ।

गण्डक कोभिड–१९ का संयोजक रहनुभएका डा. सिंहले रातदिन सेवा दिइरहेको अस्पताल र चिकित्सकमाथि नै यसरी आक्रमणको प्रयास हुन्छ भने कसरी सेवा प्रवाह गर्न सकिन्छ ? भन्दै प्रतिप्रश्न गर्नुभयो । चिकित्सक संघ नारायणी शाखाको सचिव समेत रहनुभएको उहाँले आज २ बजेसम्म दोषीमाथि कारवाही, थप जनशक्ति र सुरक्षा उपलव्ध नगराईए आफूहरु सेवा दिन नसक्ने बताउनुभयो ।

मेसु डा. उपाध्यायका अनुसार पछिल्लो समय वीरगञ्ज कोरोनाको हटस्पट बनेको छ । कोरोना समुदायस्तरमा फैलिएको अनुमान छ । संक्रमण यसरी छरियो कि उपचारमा सम्लग्न चिकित्सक तथा नर्सहरुलाई समेत यसले संक्रमण गर्दै लग्यो । नारायणी अस्पतालका मात्रै ४५ जना बढीमा संक्रमण भएपछि सेवा बन्द गर्नुको विकल्प भएन ।

यसरी घट्यो घटना

पछिल्ला केही दिन यता वीरगञ्जमा कोभिडको कारण मृत्यु हुनेको संख्या पनि बढ्यो । यता बन्द छ, खुलेका केही निजी अस्पतालले विरामी लिन अघि पीसीआर रिपोर्ट खोज्ने र यता र उता फर्काउने अवस्था भयो । बिरामी यता र उता गर्दागर्दै केहीको ज्यान समेत गयो । यसबाट स्थानीयबासी स्वभाविक रुपमा आक्रोशित भए ।

त्यसैमा केही अराजक तत्व मिसियो र भौतिक आक्रमणको प्रयास गर्‍यो । मृत्यु भएकोप्रति हामी पनि दुखित छौँ, तर यसमा हाम्रो दोष हो भनेर जो बुझिएको छ र भनिएको छ त्यो विल्कुल गलत हो । महामारीको बेलामा एक अर्कालाई सहयोग गर्नुपर्छ । सरकारी निजी दुबैले उसै गरी सेवा दिनुपर्दथ्यो । त्यो भएन । यहिबाट बाताबरण विग्रियो ।

यसैबीच सरकारी चिकित्सक संघ नेपाल (गोदान)ले आइतबार नारायणी अस्पतालमा घटेको घटनाको भत्सना गर्दै दोषीमाथि कडा कारवाही गर्न सरकारसंग माग गरेको छ । गोदानका अध्यक्ष डा. रविन खड्का र महासचिव डा. कीर्तिपाल सुवेदीद्धारा जारी विज्ञप्तीमा चिकित्सकमाथि आक्रमण गर्ने व्यक्तिहरुको पहिचान गरी गैर जमानति हिरासतमा लिएर कारवाही गर्न समेत माग गरिएको छ ।

यसैबीच घटनाको विरोध गर्दै नेपाल चिकित्सक संघ नारायणीले चिकित्सक तथा स्वास्थ्यकर्मीको मनोबल घट्ने खालका कुनै पनि गतिविधि नगर्न सबैलाई अपिल गरेको छ । आइतबार भएको प्रदर्शन र तोडफोडको घटनापछि संघका नारायणी अस्पताल शाखा सचिव डा. उदय कुमार सिंहले विज्ञप्ती निकालेर अप्ठेरो परिस्थितिमा संयम हुन सबैलाई आग्रह गर्नुभएको छ ।

दोषीलाई पक्राउ गरी अबिलम्ब कानुन बमोजिमको हदैसम्म कारबाही गर्न संघ सम्बन्धित निकायसँग जोडदार माग गर्दछ । साथै नारायणी अस्पतालमा भएको यस्तो दुःखद घटना अन्य कुनै स्वास्थ्य सेवा प्रदायकमा नदोहोरियोस् भन्ने सुरक्षाको प्रत्याभूति गराउन नेपाल चिकिसक संघ स्थानीय प्रशासनसँग आग्रह गर्दछ,’ घटनाको निन्दा र भत्र्सना गर्दै विज्ञप्तीमा लेखिएको छ ।