काठमाडौं, साउन २६

देशभर पछिल्लो २४ घण्टामा ३३८ जनामा कोरोना संक्रमण पुष्टि भएको छ । स्वास्थ्य तथा जनसंख्या मन्त्रालयका अनुसार देशका विभिन्न ३७ वटा प्रयोगशालामा ८४३२ जनाको पिसिआर परिक्षण गरिएकोमा ३३८ जनामा कोरोना संक्रमण देखिएको हो ।

आज गरिएको पिसिआर परिक्षणसहित हालसम्म नेपालमा ४ लाख ५२ हजार २३६ जनाको पिसिआर परीक्षण भएको छ । स्वास्थ्य तथा जनसंख्या मन्त्रालयको नियमित कोरोना ब्रिफिङका क्रममा प्रवक्ता प्रा.डा. जागेश्वर गौतमले ३३८ जनामा संक्रमण देखिएसँगै नेपालमा कोरोना संक्रमित संख्या २३३१० पुगेको बताउनुभयो ।

आज देशभर सक्रिय संक्रमितको संख्या ६ हजार ७३८ रहेको छ । त्यस्तै २४ घण्टामा १४० जना संक्रमित निको भएर घर फर्किएका छन् । हालसम्म कोरोना संक्रमणबाट मुक्त हुनेको संख्या १६ हजार ४९३ पुगेको छ । क्वारेन्टाइनमा १० हजार ७५९ जना रहेका छन् ।