काठमाडौं, भदौ २५

सरकारले एसिड आक्रमण गर्नेलाई कारबाही गर्न कडा कानून ल्याउने तयारी गरेको छ। प्रधानमन्त्री केपी शर्मा ओलीले अमानवीय र जघन्य अपराधका दोषीमाथि कारबाही गर्न अध्यादेशमार्फत् तत्काल नयाँ कानून बनाइने बताउनुभएको छ । प्रधानमन्त्री ओलीले १५ दिनभित्र कानूनको मस्यौदा तयार गरिसक्न कानूनमन्त्री र सम्बद्ध निकायलाई निर्देशन दिइसकेको प्रेस सल्लाहकार सूर्य थापाले जानकारी दिनुभयो ।

१५ दिन भित्रै कानुन मस्यौदा गरिसक्न समय दिइएको उहाँले सुनाउनुभयो । एसिड आक्रमण गर्ने अपराधीको सम्पत्ति रोक्का गरी उपचार र क्षतिपूर्ति भराउने पनि कानूनमा व्यवस्था गर्न लागिएको हो। बिहीबार १२ जना एसिड पीडितहरूसँग प्रधानमन्त्रीले संवाद गर्नुभएको थियो ।

एसिड पीडितलाई वीर र शिक्षण अस्पतालमा उपचारको प्रवन्ध मिलाउने र पीडितको सम्पूर्ण खर्च सरकारले व्यहोर्ने पनि प्रधानमन्त्रीको भनाइ छ। एसिड आक्रमणमा परेकाहरूले पढ्न चाहेमा सरकारले निःशुल्क पढ्ने व्यवस्था मिलाउने प्रधानमन्त्रीले बताउनुभएको छ ।