२० जेष्ठ २०७६, सोमबार ००:००

बढे आँखाका बिरामी, चिकित्सकले देखाए यस्तो कारण


अच्युत रेग्मी/काठमाडौं

नेपाल आँखा अस्पताल त्रिपुरेश्वरमा आँखाका बिरामी बढ्दै गएका छन् । पछिल्लो समय बढ्दै गएको धुलोधुँवा, वायुप्रदूषण र बढ्दो सामाजिक सञ्जालकोे प्रयोगसँगै आँखाका बिरामी बढेका हुन ।

अस्पतालका प्रमुख कार्यकारी अधिकृत दमनबहादुर घले नयाँ प्रविधिको प्रयोगसँगै आँखाका बिरामी बढेको बताउनुहुन्छ । ‘पहिला दैनिक ३ सय व्यक्तिले बहिरङ्ग (ओपिडी) सेवा र दैनिक पाँच जनाले शल्यक्रिया सेवा लिने गरेकोमा अहिले दैनिक ५ सयले ओपिडी र ३० भन्दा बढीले शल्यक्रिया सेवा लिएका छन,’ घलेले भन्नुभयो । उहाँका अनुसार क्यानडा अप्रेसन आइसाइड युनिभर्सल र नेपाल आँखा अस्पतालको साझेदारीमा भौतिक व्यवस्थापन पक्षको सुधारसँगै सर्जरी गर्नको लागि १५ देखि २० मिनेट लाग्नाले विरामीको संख्या पहिलेको तुलनामा बढेको हो ।

अस्पतालको सेवा विस्तारको लागि क्यानडा अप्रेसन आइसाइड युनिभर्सलले एक करोड रुपैया बराबरको आर्थिक सहयोग गरेको छ । विगतमा एउटा शल्यक्रिया गर्न चार घण्टासम्म लाग्ने र दुई तीन दिनसम्म आराम गरेर बस्नुपर्ने बाध्यता भए पनि नयाँ प्रविधिको प्रयोगसँगै अहिले उक्त प्रक्रिया हटेको छ । यस्तै अस्पतालमा कार्यरत कर्मचारीलाई क्यानडा अप्रेसन आइसाइड युनिभर्सलले तालीम समेत प्रदान गर्दै आएको छ । उक्त अस्पतालमा हाल एक सय कर्मचारी तथा चिकित्सकले सेवा प्रदान गर्दै आएका छन् ।

अस्पतालका अधिकृत केदार कार्की नेपाल आँखा अस्पतालले आगामी दिनमा आफ्नो सेवा विस्तार गर्न लागेको बताउनुहुन्छ । ‘त्रिपुरेश्वरबाट सेवा दिएको अस्पतालले बाराको सिमराबाट सेवा दिनका लागि अस्पतालको नाममा जग्गासमेत प्राप्त गरिसकेको छ,’ कार्कीले भन्नुभयो ।
सिमरामा अस्पताल निर्माणका लागि सिमरा उपमहानगरपालिका–४ निवासी काशिम मियाँले दुई करोड रुपैया मूल्य बराबरको पाँच कठ्ठा जग्गा सहयोग गर्नुभएको छ । कम समयमा गुणस्तरीय सेवा प्रदान गर्न अस्पताल लागिरहेको कार्कीको भनाइ थियो ।

अस्पतालले आर्थिक वर्ष २०७४/७५ मा एक लाख २८ हजार ७१६ बिरामीलाई ओपिडी सेवा प्रदान गरेको छ भने ६ हजार बिरामीको शल्यक्रिया गरेको छ । चालू आर्थिक वर्षमा भने एक लाख १२ हजार ५ सय २० बिरामीलाई ओपिडी सेवा र पाँच हजार बिरामीको सर्जरी गरेको अस्पतालका अधिकृत कार्की बताउनुहुन्छ । अस्पतालले हाल वार्षिक विभिन्न जिल्लाका १५ देखि २० स्थानमा निःशुल्क स्वास्थ्य शिविर सञ्चालन गर्दै आएको छ । तनहुँ, लमजुङ, गोरखा, जुम्ला, ओखलढुङ्गा, धादिङ, रामेछाप, दोलखालगायतका पहाडी जिल्लामा निःशुल्क स्वास्थ्य शिविर सञ्चालन गरेको अस्पतालले जनाएको छ ।

नेपाल आँखा अस्पतालले सञ्चालन गरेको निःशुल्क स्वास्थ्य शिविरमा दश हजार बिरामीलाई ओपिडी सेवा र एक हजार बिरामीलाई शल्यक्रिया सेवा प्रदान गरेको छ । यस्तै विभिन्न विद्यालयका विद्यार्थीलाई समेत सेवा प्रदान गर्दै आएको छ । अस्पतालले ८० रुपैयाँमा बिरामीलाई ओपिडी सेवा प्रदान गर्दै आएको छ । आँखाका बिरामीलाई दिने सेवालाई झन्झटमुक्त बनाउन टोकन प्रक्रिया शुरु गरिएको अस्पतालले जनाएको छ । रासस