काठमाडौं, माघ २८ ।  तराई मधेस केन्द्रित दलका नेताले मधेसवादी दलहरू विदेशी शक्तिले बनाएका हुन् भन्ने माओवादी अध्यक्ष पुष्पकमल दाहालको अभिव्यक्तिको निन्दा गरेका छन्। सँगसँगै उनीहरूले दाहाल नै चीनबाट सञ्चालित भएको आरोप पनि लगाएका छन्।

दाहालले बिहीबार एक सार्वजनिक कार्यक्रममा मधेस केन्द्रित दलहरू विदेशी शक्तिले बनाएको आरोप लगाउनुभएको थियो । दाहालले शान्तिसम्झौतापछि सिंगो मधेस माओवादीमय भएको र यसबाट आत्तिएका विदेशी शक्तिले मधेस केन्द्रित दलहरू बनाएको आरोप लगाउनुभएको हो । जनता समाजवादी पार्टीका अध्यक्ष मनिष सुमनले दाहालबाट यस्तो अभिव्यक्ति आउनु अत्यन्त खेदजनक र दुभाग्र्यपूर्ण भएको बताउँदै भन्नुभयो , ‘दाहाल आफैं विदेशबाट सञ्चालित छन्। उहाँ चीनबाट सञ्चालित नेता हुनुहुन्च ।’ आफूहरू राष्ट्रियताप्रति हृदयदेखि नै प्रतिबद्ध भएको बताउँदै सुमनले थप्नुभयो ‘यो देशको मूल नेपाली भनेको हामी हौं। हामी कतैबाट सञ्चालित छैनौं। आफ्नो माटोप्रति प्रतिबद्ध छौं।’ दाहालको बोलीको ठेगान नभएको आरोप पनि उहाँले लगाउनुभयो ।

‘उहाँले कुन बेला के भन्नुहुन्छ, पत्तै हुन्न। उहाँको बोलीको ठेगान हुँदैन। विदेशबाट सञ्चालित भएको व्यक्तिको बोली यस्तै हुन्छ’, उहाँले भन्नुभयो । यसैगरी लोकतान्त्रिक समाजवादी पार्टीका कार्यकारिणी समिति सदस्य केशव झाले दाहालको पार्टीको नाम विदेशी व्यक्तिहरूको नामबाट राखिएको बताउँदै भन्नुभये , ‘हामीले विदेशी नामबाट पार्टीको नाम राखेका छैनौं। उहाँहरूले माओ, लेनिन, स्टालिनजस्ता विदेशी व्यक्तिको नामबाट पार्टीको नाम राख्नुभएको छ।’ दाहाल आफैं विदेशबाट आयातित व्यक्ति भएको झाले आरोप लगाउनुभयो ।

‘उहाँ आफैं विदेशबाट आयातित व्यक्ति हो। त्यसैले उहाँले अरूलाई आयातित देख्नुहुन्छ,’ उहाँले थप्नुयभो , ‘सबैभन्दा बढी राष्ट्रवादी हामी हौं। हाम्रो पार्टी हाम्रो देशभित्र बनेको छ। दाहालको पार्टी विदेशमा बनेको हो।