सिक्किम, असार २५। छिमेकी मुलुक भारतको सुन्दर राज्य सिक्किमका मुख्यमन्त्री प्रेमसिंह तामाङ (गोले) ले सिक्किमबाट सिधै नेपालको राजधानी काठमाडौं जाने गरी नेपाल र भारतबीचको चिवा भञ्ज्याङ नाका खोल्न लागेको बताउनु भएको छ ।

सिक्किमको देन्ताममा आयोजित दोस्रो अन्तर्राष्ट्रिय तमु (गुरुङ) सम्मेलनको उद्घाटन गर्दै मुख्यमन्त्री तामाङले यस्तो घोषणा गर्नुभएको हो । अव सिक्किमबाट सिधै काठमाडौं जाने गरी नाका खोल्न लागेको भन्दै उहाँले सिलिगुढीहुँदै काँकडभिट्टाबाट घुमेर जाने अवस्थाको अन्त्य गर्न आफू लागि परेको पनि बताउनु भयो ।

चिवा भञ्ज्याङ कोरिडोर खुलेपछि सिक्किममा स्थापना भइरहेका ठूला मेडिकल कलेज र अस्पतालहरुमा नेपालबाट विद्यार्थी तथा बिरामी आउने उहाँको भनाई छ । खासगरी प्रदेश १ का बिद्यार्थी तथा बिरामी सिक्किम पढन रउपचार गर्न आउने बताउनु भयो ।

‘चिवा भन्ज्याङ कोरिडोर खुलेपछि नेपालको प्रदेश १ का मान्छेहरु काठमाडौं जाँदैनन्, उपचारका लागि यता आउँछन् । हामी पनि काँकडभिट्टा किन घुम्ने सिधै चिवा भञ्ज्याङबाट काठमाडौं जाने । यसरी हामी काम गरिरहेका छौं,’ मुख्यमन्त्री तामाङले भन्नुभयो ।