काठमाडौं, पुस १९ । सत्तारुढ गठबन्धनमा सहभागी जनता समाजवादी पार्टी (जसपा) ले प्रधानमन्त्री पुष्पकमल दाहाल, प्रचण्ड नेतृत्वको सरकारमा सहभागी हुन सर्त राखेको छ ।

जसपाले सम्मानजनक शक्ति बाँडफाँट भए मात्रै सरकारमा जाने निर्णय गरेको हो । मंगलबार सम्पन्न राजनीतिक समितिको बैठकले आफूहरूको सम्मानजनक प्रतिनिधित्व भए सरकारमा सहभागी हुने, नभए बाहिर बसेर समर्थन गर्ने निर्णय गरेको छ ।

राजनीतिक समितिमा सरकारमा जाने नजाने विषयमा सदस्यहरूको मत बाझिएको थियो । तर बहुसंख्यक सदस्यहरू सरकारमा जानुपर्ने पक्षमा उभिएपछि सम्मानजनक शक्ति बाँडफाँट र सरकारको नीति तथा कार्यक्रममा परिवर्तनका एजेण्डाहरू समावेश भए सरकारमा सहभागी हुने निर्णय गरेको हो ।

बैठकले विभिन्न दल तथा संगठनसँग एकता तथा गठबन्धनसम्बन्धी वार्ताका लागि पार्टीको केन्द्रीय कार्यकारिणी सदस्य राजेन्द्र श्रेष्ठको संयोजकत्वमा रकम चेम्जोङ र गोविन्द चौधरी सदस्य रहेको वार्ता समिति बनाएको प्रवक्ता पार्टी प्रवक्त मनिषकुमार सुमनले जानकारी दिनुभयो ।

बैठकले चुनावमा अन्तर्घात गर्ने संघीय परिषद् र केन्द्रीय सदस्यहरूबारे छानबिन गर्न शिवलाल थापाको नेतृत्वमा ५ सदस्यीय समिति पनि गठन गरेको छ । चुनावमा पार्टीका उम्मेदवारविरुद्ध उम्मेदवारी दिनेहरूलाई भने सम्बन्धित समितिले विधानअनुसार कारबाही गर्ने राजनितिक समितिले निर्णय गरेको छ ।

त्यस्तै विधान अधिवेशनका लागि विधानको मस्यौदा बनाउन अध्यक्ष उपेन्द्र यादवको नेतृत्वमा ११ सदस्यीय विधान मस्यौदा समिति समेत गठन गरिएको छ । समिति सदस्यहरुमा राजेन्द्र श्रेष्ठ, रकम चेम्जोंग, शुशिला श्रेष्ठ, शिवलाल थापा मगर, लालबाबु राउत, दीपेन्द्र झा, दिपक राई, पंचलाल महर्जन, विरेन्द्र ठाकुर र भगवती सुवेदी हुनुहुन्छ ।