काठमाडौं, २१ जेठ ।  प्रधानमन्त्री केपी शर्मा ओलीले पारिवारिक स्थिति तनावपूर्ण हुनेहरूले सामाजिक सञ्जालमा मुख छाड्ने निष्कर्ष सुनाउनुभएको छ । आईडिया स्टुडियोले काठमाडौंमा आयोजना गरेको नवप्रवर्तक युवासँग प्रधानमन्त्री अन्तरक्रियामा बोल्दै प्रधानमन्त्री ओलीले युवाहरूलाई तनावमुक्त भएर बस्न सुझाव दिनुभयो ।

उहाँले युवाले चित्त बुझाउन नहुने र परिवर्तनको लागि लाग्नुपर्नेमा जोड दिनुभयो। ‘तर चित्त नबुझाउने भनेको अरूलाई गाली गर्ने, केही नगर्ने, नकरात्मक ढंगले मात्रै चल्ने, त्यसले कसैलाई राम्रो गर्दैन,’ उहाँले भन्नुभयो । उहाँले भन्नुभयो ‘यो फेसबुक–सेसबुकमा मुख छाडेर हिँड्नेहरूको पारिवारिक स्थिति तपाईँहरूले उनीहरूको परिवारभित्र के छ भनेर हेर्नुभयो भने टेन्सन हुन्छ ।’ उहाँका अनुसार सामाजिक सञ्जालमा मुख छाड्नु उनीहरूको आदत हो । ‘किनभने त्यो आदत हो। त्यस बानीले गर्दा खेरी ऊ आफैं तनावमा हुन्छ,’ उहाँले भन्नुभयो । गाली गरेर हिंड्ने अभ्यासले व्यक्ति, परिवार र समाज कसैलाई पनि राम्रो नगर्ने तर्क गरे । उहाँले भन्नुभयो , ‘असन्तुष्ट हुँदा अरूलाई मुख छाडेर हिँड्ने, गाली गरेर हिँड्ने, काम केही नगर्ने, नकारात्मक ढंगले मात्रै चल्ने, त्यसले आफूलाई पनि राम्रो गर्दैन, आफ्नो स्वास्थ्य पनि राम्रो गर्दैन, पारिवारिक स्वास्थ्य पनि राम्रो गर्दैन, सामाजिक स्वास्थ्य पनि राम्रो गर्दैन ।’

उहाँले युवाहरूलाई केही काम गर्नासाथ घमण्ड नगर्न सुझाव दिनुभयो । ‘आफूले गरेको कामप्रति गर्व गर्नुस्, घमण्ड गर्ने होइन,’ उहाँले भन्नुभयो । प्रधानमन्त्री ओलीले रोजगारीको समस्या समाधान गर्न उद्यमशीलता विकासको विकल्प नरहेको बताउनुभयो । ‘उद्यमशीलताबाट रोजगारीका अवसर सिर्जना गर्नुपर्छ । उद्यमशीलताको विकास गर्नुपर्छ । उद्यमशीलताको विकास नगरी रोजगारी अवसर कसरी आउँछ ?,’ उहाँले प्रश्न गर्नुभयो ।

उहाँले सरकारी जागिरलाई सीमित प्रतिशतले मात्र पाउने अवसरको संज्ञा दिनुभयो । ‘यो त सीमित एक प्रतिशतले पाउने हो । एक प्रतिशतले रोजगारी पाएर त भएन नि,’ उहाँले भन्नुभयो ‘हरेक वर्ष साढे चार लाखदेखि ५ लाख युवाहरु रोजगारीका निम्ति बजारमा आउँछन् । एक प्रतिशत रोजगारी सरकारी तवरमा पाउँछौँ । दुई, तीन प्रतिशत हामीलाई चाहिएको हुन्छ ।’ प्रधानमन्त्री ओलीले उद्यमशीलतको विकास बाहेक अर्को कुनै उपाय नरहेको बताउनुभयो ।