काठमाडौं, जेठ १५ । राष्ट्रपति रामचन्द्र पौडेलले गणतन्त्र दिवसमा आममाफी दिनुभएका टिकापुर घटनामा दोषी ठहर रेशमलाल चौधरीले बहु बिवाह गरेको तथ्य खुलेको छ । नागरिक उन्मुक्ति पार्टीका संस्थापक समेत रहनुभएका पूर्वसांसद चौधरी कारागारबाट रिहा भएलगत्तै उहाँले बहुविवाह गरेको तथ्य उजागर भएको हो ।

टीकापुर हत्याकाण्डमा दोषी ठहर भएपछि डिल्लीबजार कारागारमा जन्मकैदको सजाय भुक्तान गरिरहनुभएका चौधरी राष्ट्रपतिले आममाफी दिएपछि आज रिहा हुनुभएको हो । आममाफी पाएर रिहा भएलगत्तै रेशमकी दोस्रो पत्नी आशा चौधरीले बधाई दिँदै छोरीसहितको तस्विर सार्वजनिक गरेपछि यो तथ्य बाहिर आएको हो ।

हाल बर्दीयामा रेडियो चलाएर बस्नुभएकी आशाले एक छोरीसहितको तस्विर सार्वजनिक गर्नुभएको छ । आज बिहान डिल्लीबजार कारागारबाट बाहिर आएपछि फेसबुकमार्फत आशाले रेशमलाई बधाइ तथा स्वागत गर्नुभएको हो । रेशमसँग आफ्नी छोरीसहितको फोटो राख्दै स्वागत तथा बधाइ दिनुभएको छ । रेशम र छोरीसहित तीन जनाको तस्विर राखेर आशाले लेख्नुभएको छ, ‘कङ्ग्य्राटुलेशन बुढा, बधाई ।’

हेर्नाेस आशाले फेसबुकमा गरेको पोष्ट

महेन्द्रनगरपोस्टका पत्रकार टेकसिंह धामीले यो फोटोको स्क्रीनसट गरेका हुन ।

सो पोष्ट अहिले आशाको फेसबुकबाट हटाइसकिएको छ ।  रेशमकी अर्की पत्नी रञ्जीता श्रेष्ठ हाल पुष्पकमल दाहाल प्रचण्ड नेतृत्वको सरकारमा भूमि ब्यवस्था तथा सहकारी मन्त्री हुनुहुन्छ । उहाँ नागरिक उन्मुक्ति पार्टीको अध्यक्ष पनि हुनुहुन्छ ।

काठमाडौंको क्षेत्रपाटीमा जन्मिएकी रन्जिताले रेशमसँग अन्तरजातीय विवाह गर्नुभएको हो । रञ्जीताले रेशमको एक छोरा हुर्काइरहनु भएको छ । २०७२ भदौ ७ गतेको टीकापुर घटनामा दोषी ठहर भएका रेशमलाई मात्रै माफी दिइएको हो। अन्य पाँच जना अहिले पनि कारागारमा छन्। बाँकी २९ जना फरार छन्।

थरुहट थारुवान संघर्ष समितिले २०७२ साल भदौ ७ गते कैलालीको टिकापुरमा गरेको प्रदर्शनले हिंसात्मक रुप लिँदा नेपाल प्रहरीका एसएसपी लक्षमण न्यौपानेसहित ८ जनाको मृत्यु भएको थियो। सोही घटनामा दोषी ठहर भइ आजीवन काराबासको सजाय पाएका चौधरीलाई सरकारले गणतन्त्र दिवसको अवसर पारेर सजाय माफी दिएपछि चौधरी सोमबार बिहान रिहा हुनुभएको हो । जेलमुक्त भएसँगै दुई श्रीमतीको पोइ भएको तथ्य उजागर भएको हो ।

धनगढी उपमहानगरपालिका–६ स्थित जालीमा माइत रहेकी आशासँग रेशमले टीकापुर घटना हुनुभन्दा पहिला नै दोस्रो बिवाह गर्नुभएको बताइएको छ ।