जनता टाइम्स

२१ माघ २०८१, सोमबार १७:३८

मल्पी–लिलावती सिँचाइ कुलो पुनर्निर्माण


काभ्रेपलाञ्चोक, माघ २१ । गत असोज दोस्रो साताको बाढीपहिराले क्षतिग्रस्त काभ्रेपलाञ्चोकको पनौती नगरमा ११ किलोमिटर लामो मल्पी–लिलावती सिँचाइ आयोजनाको कुलोे पुनर्निर्माण गरिएका छन् । यसका लागि करिब तीन हजार स्थानीयले श्रमदान गरेका थिए । कात्तिक दोस्रो सातादेखि पुनर्निर्माण थालिएको उक्त आयोजनाको कुलोमा आइतबार पानी परीक्षण समेत गरिएको छ । करिब तीन महिना गरिएको श्रमदानमा पनौती नगरको ४, ७ र ८ नं वडाका कृषक, महिला कृषि सहकारी, विभिन्न युवा क्लब, महिला समूह, आमा समूह, विद्यार्थी, शिक्षकलगायत सहभागी थिए ।

सरसफाइसहित पुनर्निर्माणको काम सकिएको पनौत–४ का वडाध्यक्ष दीपकप्रसाद दाहालले बताउनुभयो । ‘अब पनौतीको फाँटमा सिँचाइ गर्न सकिने भएको छ’, उहाँले भन्नुभयो । सिँचाइ कुलो पुनर्निर्माण गर्न बागमती प्रदेश सरकारबाट रु ५० लाख प्राप्त भएको उहाँले बताउनुभयो । कुलो सफाइका लागि भने श्रमदान अभियानै सञ्चालन गरिएको थियो ।

आयोजनाको क्षतिग्रस्त २० प्रतिशत संरचना नयाँ निर्माण र ८० प्रतिशत क्षेत्रमा कुलोेमा थुप्रिएको माटो निकालिएको वडाध्यक्ष दाहालले बताउनुभयो । बाढीपहिरोले सिँचाइ आयोजनाको अधिकांश भागमा क्षति पुगेको थियो । जनश्रमदान अभियानबाट कुलोे पुनर्निर्माण थालिएको करिब तीन हप्तापछि मल्पीस्थित १ नं गेटसम्म कुलो मर्मत गरी सञ्चालनमा ल्याइएको थियो । उक्त आयोजनाको पुनर्निर्माण सकिएपछि हाल पनौतीको करिब १० हजार रोपनी जमिनमा सिँचाइ सुविधा पुगेको छ ।