काठमाडौं, चैत १८ । सत्तारुढ दल नेकपा एमालेले राजतन्त्रवादीको भण्डाफोर र गणतन्त्रको पक्षमा जागरण सन्देश दिन देशव्यापी जागरण र्याली गरेको छ । गणतन्त्रमाथि नै धावा बोल्दै हत्या र लुटपाटमा राजावादी उत्रिएपछि एमालेले सवक सिकाउन सोमवार देशभर गणतन्त्रको पक्षमा र्यालीको आह्वान गरेको हो ।

एमालेको आह्वानमा सोमवार देशभरका जिल्ला सदरमुकाम र प्रमुख सहरहरूमा गणतन्त्रका पक्षमा जागरणसभा र मोटरसाइकल र्याली आयोजना गरिएको छ । एमालेले काठमाडौं उपत्यकाको हकमा संयुक्त रूपमा मोटरसाइकल र्याली गरिएको महासचिव शंकर पोखरेलले बताउनु भयो । काठमाडौंमा तीनकुनेदेखि भक्तपुरको सल्लाघारीसम्म मोटरसाइकल र्याली गरिएको हो । र्यालीमा हजारौं नागरिक उत्रिएका छन ।

लोकतान्त्रिक गणतन्त्र सरकारको मात्र सरोकारको विषय नभई जनताको बलिदानीपूर्ण संघर्षको उपलब्धि पनि भएकाले त्यसको रक्षाको लागि एमालेले कार्यक्रम गरेको महासचिव पोखरेलले बताउनु भयो । र्यालीको समापन समारोहलाई सम्बोधन गर्दै महासचिव पोखरेलले गणतन्त्रको रक्षाका लागि नागरिक तत्पर रहेको भन्दै तात्कालिन राजा ज्ञानेन्द्र शाह जनताले सम्मानका साथ राखिएको स्थानमा नबसे सवै कुरा गुमाउनु पर्ने चेतावनी दिनुभएको छ ।

राजावादीको सक्रियता बढेपछि त्यसको प्रतिवाद गर्न एमालेले देशव्यापी अभियानको घोषणा यसअघि नै गरेको थियो । त्यही घोषणाअनुसार सोमवार र्याली गरेको हो । एमालेले मात्रै नभई गणतन्त्र पक्षधर अन्य दलहरूले पनि राजावादीको जनआन्दोलनलाई प्रतिवाद गर्न देशव्यापी रूपमा आन्दोलन अगाडि बढाइरहेको छ । राजावादीहरूले गत शुक्रबार गरेको आन्दोलन तोडफोड र लुटपाटमा केन्द्रित भएपछि अहिले चर्को विवादमा फसेको छ ।

तीनकुने घटनाको मुख्य जिम्मेवार पूर्वराजा ज्ञानेन्द्र शाह नै भएको ठहर गर्दै मुख्य राजनीतिक दलहरूले कारबाहीको चेतावनी दिइरहेका छन । यही बेला एमालेले १० वटा नारासहित जागरण अभियान अघि बढाएको हो । जसअनुसार हत्या, हिंसा लुटपाट बन्द गरे, जन्मसिद्ध अधिकार अस्वीकार गरौं, दास र रैती बन्न मञ्जुर छैन, हत्यारालाई कारबाही गर, शान्ति सुरक्षा कायम गर, सामाजिक अराजकता अन्त्य गर भन्नेलगायतका छन ।

‘प्रतिगमनको दुश्प्रयासलाई नाकाम बनाऔं । लोकतान्त्रिक गणतन्त्रको पक्षमा दृढता प्रकट गरौं,’ भन्ने मुल सन्देश बोकेर र्याली सम्पन्न गरिएको एमालेले जनाएको छ ।