काठमाडौं, १६ जेठ । नेकपा एमालेका महासचिव शंकर पोखरेलले समाजका हरेक क्षेत्र माथि प्रश्न उठ्ने गरेको बताउनुभएको छ ।

नेपाल निजामती कर्मचारी संगठनको दोस्रो केन्द्रीय बैठक तथा केन्द्रीय प्रशिक्षक प्रशिक्षण कार्यक्रमलाई शुक्रबार काठमाडौंमा सम्बोधन गर्दै महासचिव पोखरेलले यदि सबै चिज राम्रो भएका भए प्रश्न नउठ्ने बताउनुभयो । प्रश्न उठ्नको अर्थ ती क्षेत्रमा कमजोरी भएका र त्यसलाई सुधारेर अघि बढ्नु पर्ने उहाँले धारणा राख्नु भयो । ‘जब समस्या आउँछ, तब प्रश्न उठ्ने गर्दछ, प्रश्न उठेपछि जवाफ दिनु पर्दछ, त्यसो जवाफ कहिले प्रतिक्रियात्मक हुने गर्दछ’, पोखरेलले भन्नुभयो ।

उहाँले प्रश्नबाट भाग्न नसकिने बताउनुभयो । हरेकले उठेका प्रश्नको जवाफ दिनु पर्ने उहाँको भनाइ छ । त्यस प्रश्न कहिले राजनीतिक नेतृत्वलाई, कहिले कर्मचारीलाई, कहिले सामाजिक अगुवालाई आउने गरेको बताउँदै उहाँले त्यसको जवाफ दिनै पर्ने बताउनुभयो ।

अहिले सामाजिक क्षेत्रबाट उठ्ने प्रश्नको निशाना राजनीतिक क्षेत्र र राजनीतिक नेतृत्व हुने गरेको बताउनुभयो । अहिले कतिपय प्रश्नहरू नकारात्मक कोणबाट उठ्ने गरेका उहाँको भनाइ छ ।

राजनीतिक नेतृत्व माथि नकारात्मक प्रश्न र अनुचित प्रहार हुँदा अन्य क्षेत्र मौन बस्ने गरेको बताउँदै उहाँले यसले बिस्तारै सबै पक्ष माथि प्रहार हुने कुरा नबिर्सन आग्रह गर्नुभयो । यस्ता नकारात्मक प्रश्नका जवाफ सामूहिक हिसाबले नदिने हो भने भोलि देश बरबादी तर्फ जाने उहाँको धारणा छ ।

राज्य सञ्चालनमा राजनीतिक नेतृत्व र कर्मचारी प्रशासन बिच तादम्यता नै नमिलेको उहाँले बताउनुभयो । नेपालको निजामती प्रशासनले अहिलेको परिवर्तनलाई महसुस नै गर्न नसकेको उहाँको भनाई छ । अहिले पनि कर्मचारीतन्त्र अधिकार जति माथि नै राख्न पाए हालिमुहाली गर्न पाइन्छ भन्ने मनस्थितिमा रहेका उहाँले प्रष्ट पार्नुभयो ।

केन्द्रीय प्रशासन सकारात्मक भएको भए निजामती कर्मचारी ऐन, प्रहरी ऐन, शिक्षा ऐन लगायतका ऐनहरु आउन यति ढिलो नहुने उहाँले बताउनुभयो । दोष राजनीतिक नेतृत्व र सांसदहरुलाई दिए पनि कर्मचारी प्रशासनले अधिकार तल दिन नचाहाँदा यी ऐन आउन ढिलाई भएको उहाँको धारणा छ । ‘केन्द्रिकृत प्रशासनिक नेतृत्व नै यो विलम्बको कारण हो’, उहाँले भन्नुभयो ।