भक्तपुर, २२ जेठ । नेकपा एमालेका महासचिव शंकर पोखरेलले नेपालमा राजनीतिक दलले विकास र समृद्धिका लागि देशमा काम नै गर्न नपाएको बताउनुभएको छ ।

नेकपा एमाले वाग्मती प्रदेश प्रचार तथा प्रकाशन विभागले बिहीबारबाट भक्तपुरमा आयोजना गरेको प्रचार कार्यशालामा बोल्दै पोखरेलले नेपालमा राजनीतिक दलले जम्मा १५ वर्ष मात्र काम गर्न पाएका बताउनुभयो । बाँकी सबै समय यो देशमा राजतन्त्रले राज गरेका बताउँदै उहाँले  राजनीतिक दलले छोटो समयमा पनि धेरै काम गरेका दाबी गर्नुभयो । ‘नेपालका राजनीतिक दलले छोटो समयमा देश विकासको लागि उल्लेख्य काम गरेका छन्’, उहाँले भन्नुभयो ।

पोखरेलले नेपालका राजनीतिक दल मध्ये एमाले सबैभन्दा बढी देशको समृद्धिका लागि काम गर्ने पार्टी भएको दाबी गर्नुभयो । उहाँले नेकपा एमालले राम्रो काम गरेकै कारण एमाले माथि आक्रमण भइरहेको बताउनुभयो ।

एमाले माथि राजवादी, मण्डले, आफूलाई कम्युनिष्ट भन्ने कम्युनिष्ट विरोधी,  लोकप्रियतावादमा विश्वास गर्ने र नेपाललाई आफ्नो क्रिडास्थल बनाउन चाहने अन्तर्राष्ट्रिय शक्तिले सामूहिक रूपमा माथि आक्रमण गरिरहेका पोखरेलले बताउनुभयो । उनीहरूले एमाले हुँदासम्म आफ्नो स्वार्थ पुरा नहुने देखेर एमाले माथि सामूहिक आक्रमणको प्रयास गरिरहेका पोखरेलको भनाइ छ ।

एमालेले देशका लागि धेरै काम गरेको भए पनि अझै धरै गर्नुपर्ने उहाँले बताउनुभयो । यसका लागि अनुकूल वातावरण नबन्दा एमालेले सोचे जति काम गर्न नसकेको उहाँको भानाइछ । ‘राजनीतिक अस्थिरता र सामाजिक अराजकता देश विकासमा बाध बनेको छ’, उहाँले भन्नुभयो ।

त्यसले एमालेले एमालेको नीतिलाई राष्ट्रको नीति बनाउन चाहेको उहाँले बताउनुभयो । त्यसको लागि नेकपा एमालेको एकल बहुमतको सकार आवश्यकता रहेको उहाँले सुनाउनुभयो । एमालेको एकल सरकार नबन्दासम्म एमालेको नीति जति राम्रो भए पनि नेतृत्व जतिसुकै सबल भए पनि त्यसलाई देशको समृद्धमा प्रयोग गर्न नसकिने पोखरेलले बताउनुभयो । त्यसैले प्रचारको कामलाई सबल बनाइ एमालेको मिसन २०८४ लाई सफल बनाउने काममा लाग्न उहाँले आग्रह गर्नुभयो ।