काठमाडौं, २ असार । सोमबार बिहानै रामेछाप अस्पतालका निमित्त मेडिकल सुपरिटेन्डेन्ट डा. केशव श्रेष्ठको ‘सबैलाई अल बिदा’ लेखेको स्ट्याटस सामाजिक सञ्जाल फेसबुकमा आयो ।

सुसाइड नोटको शैलीमा लेखिएको सो स्ट्याटसले सबैलाई सशङ्कित बनायो । आफूले रामेछाप अस्पताललाई व्यवस्थित बनाउन सङ्घर्ष गर्दा गर्दै आफ्नो विरुद्ध झुटो आरोप लगाइएको, आफूसँग पैसा मागेको, महिला डाक्टरहरूलाई प्रयोग गरेर आफ्नो चरित्र हत्या गर्ने प्रयास गरिएको, आर्थिक चलखेल गरेको लगायतका आरोप लगाएर डा. श्रेष्ठले लामो स्ट्याटस लेख्नु भएको थियो ।

उहाँले त्यसमा नेपाली कांग्रेस पार्टीका स्थानीय नेता रामेछाप नगरपालिका–८ का पूर्ववडाध्यक्ष केदार कार्कीको नाम सबैभन्दा बढी लिनु भएको थियो । कार्कीले धम्क्याएकोदेखि पैसा मागेकोसम्म स्ट्याटसमा लेखिएको थियो ।

श्रेष्ठले मन्त्रालयका प्रशासन शाखा प्रमुख कुमार पौडेलदेखि मन्त्रालयका कर्मचारी रेवती थापालाई समेत आर्थिक चलखेल गरेर आफूलाई सरुवा गरेको आरोप लगाउन भ्याउनु भएको छ ।

खासमा के थियो लफडा ?

डा. केशव श्रेष्ठ आठौँ तहका मेडिकल अधिकृत हुन् । प्रदेशले सञ्चालन गरेको जिल्ला अस्पतालमा कम्तीमा पनि नवौँ तहको मेडिकल अधिकृत कार्यालय प्रमुख हुने गर्दछ । आठौँ तहका केशव १८ महिनादेखि रामेछाप अस्पतालमा निमित्त प्रमुख भएर काम गर्दै आउनुभएको थियो ।

यस बिचमा प्रदेश सरकारले नवौँ तहको मेडिकल अधिकृतलाई रामेछाप अस्पताल पठाएको पनि हो । तर डा. श्रेष्ठले स्थानीयलाई घेर्न लगाएर अस्पतालमा हाजिर हुन नदिएर नवौँ तहका अधिकृतलाई रामेछाप अस्पताल छाडेर जान बाध्य गराएका थिए ।

माथिल्लो योग्यता भएका डाक्टरहरू हुँदा हुँदै लामो समयदेखि निमित्तको भरमा अस्पताल चलिरहेको थियो । माथिल्लो योग्यताको डाक्टर आउने कुरा थाहा पाउने बित्तिकै शक्तिकेन्द्रहरूमा धाएर श्रेष्ठले उहाँहरूको सरुवा रोक्दै आउनु भएको थियो ।

राजनीतिक अस्थिरताको लाभ उठाउँदै श्रेष्ठ कांग्रेस, एमाले, माओवादी सबै पार्टीका नेताहरुकोमा पुग्दै म तपाईँकै मान्छे हुँ भन्दै आफ्नो स्वार्थ पुरा गर्दै आउनु भएको थियो । रामेछाप बजारमा भने अहिले उहाँले जसलाई आरोप लगाइरहनुभएको छ उहाँहरूकै साथ र सहयोग लिएर डा. श्रेष्ठले एकलौटी राज गर्ने राजनीति बनाउनुभएको थियो ।

जब डा. श्रेष्ठसँग संरक्षण गर्नेहरूकै खटपट भयो । अरू सबै चिढ्याइ सकेको कारण चिढिएकाहरूबाट सहयोग हुने कुरै भएन । त्यस पछि डा. श्रेष्ठको राजनीतिले काम गरेन ।

अझ महिला स्वास्थ्यकर्मी माथि दुर्व्यवहार गरेको लिखित उजुरी समेत परेपछि वाग्मती प्रदेश स्वास्थ्य मन्त्रालयले २४ घण्टे पत्र काटेर प्रदेश स्वास्थ्य मन्त्रालयमा झिकायो ।

मन्त्रालयमा जाँदा पनि डा. केशव एक्लै जानुभएन । अस्पतालको अति संवेदनशील डाइग्लोसिस सेवा प्रभावित हुने गरी सो सेवाका डाक्टरहरू समेतलाई गाडीमा हालेर लिएर जानुभयो ।

मन्त्रालयमा पुग्नु भएका श्रेष्ठलाई मन्त्रालयले हेटौँडा अस्पतालमा सरुवा गर्‍यो । रामेछापमा अर्को मेडिकल सुपरिटेन्डेन्ट पठाउने निर्णय गर्‍यो । रामेछापमा प्रमुख भएका श्रेष्ठलाई त्यो कुरा सह्यै भएन । आर्थिक वर्षको अन्तिममा आर्थिक चलखेल गरेर आफूलाई सरुवा गरिएको आरोप उहाँले मन्त्रालयका कर्मचारीलाई फेसबुक मार्फत लगाउनुभयो । जसलाई अब श्रेष्ठले प्रमाणित गर्नुपर्ने छ ।

हेटौँडाबाट काठमाडौं अल बिदा शिर्षककाे नाेट, अनि माेबाइल स्विच अफ 

हेटौँडा पुग्नु भएका डा. श्रेष्ठ काठमाडौं आउनुभयो र सुसाइड नोटको स्ट्याटस फेसबुकमा राख्नु भयो । आफू माथि अन्याय भएकोले बाँच्ने आधार नै नभएको लेख्नुभयो । त्यति मात्र होइन आफ्नो लास माथि राजनीति नगर्न भन्दै लेख्नु पनि भ्याउनुभयो । त्यति लेखेर श्रेष्ठले मोबाइल अफ गर्नुभयो ।

स्ट्याटस लेखेर मोबाइल अफ गरेपछि हल्लाखल्ला भयो । खोजी गर्न प्रहरी परिचालित भयो । प्रहरीले मोबाइल ट्रयाकिङ गर्दा लोकेसन काठमाडौंमा देखायो ।

प्रहरीले खोजी गर्दै जाँदा सुसाइड नोट लेखेका डाक्टरलाई क्याफेमा साथीहरूसँग कफी खाएर बसिरहेको अवस्थामा फेला पार्‍यो । श्रेष्ठलाई काठमाडौंको तार्केश्वर नगरपालिका–३ स्थित श्रीनाथ वुटिक रिसोर्टमा कफी खाइरहेको अवस्थामा प्रहरीले भेट्टायो ।

प्रहरीले भेट्नासाथ ‘तपाईँ यहाँ किन ?’ भनेर सोध्दा  श्रेष्ठको जवाफ थियो ‘मर्न आएको ।’

फेरी प्रहरीले सोध्यो ‘जिउँदै हुनुहुन्छ त ?’ उहाँको जवाफ थियो ‘डोरी पाइएन ।’

केही घण्टा प्रहरी, प्रशासन, मन्त्रालय, परिवार सबै तनावमा परे । शुभेच्छुक र शुभचिन्तकहरू चिन्तामा डुबे । ‘केही बेर तनाव भयो, तर छिट्टै अवस्था सार्वजनिक भयो’, वाग्मती प्रदेशका स्वास्थ्य मन्त्री किरण थापा मगरले भन्नुभयो ।

कर्मचारीहरूको सरुवा, बढुवा, स्पष्टीकरण वा गलत गर्दा कारबाही नियमित प्रक्रिया हो । एउटा जिम्मेवार डाक्टरले आफ्नो सरुवाको विषयलाई लिएर वा मन्त्रालयले केही उजुरी माथि छानबिन र बुझ्नको लागि मन्त्रालय बोलाउँदा वा पत्र काट्दा यो तहसम्मको काम गर्नु डाक्टर माथि राजनीति कि डाक्टरको राजनीति ?

यस्ताे थियाे स्ट्याटस :