हुम्ला, ५ साउन ।  हुम्ला जिल्लाको चंखेली गाउँपालिका अन्तर्गतको लोती कर्णालीमा बेलिब्रिज निर्माण कार्य सम्पन्न भएको छ। यससँगै चंखेली क्षेत्र हुँदै मुगु, जुम्ला भएर सुर्खेतसम्मको यात्रा सहज र सुरक्षित बन्ने भएको छ।

चंखेलीको दुर्गम भूगोल र विकट बाटो पार गर्न स्थानीय बासिन्दा वर्षौँसम्म सास्ती भोग्दै आएका थिए। कर्णाली नदीको उर्लंदो बहावमा हिउँद–बर्खा सजिलो यात्राको कल्पना गर्न पनि मुस्किल हुने अवस्था थियो। अब बेलिब्रिज बनेसँगै आवतजावत सहज हुनेछ भने विकासका अन्य सम्भावनाहरू पनि विस्तार हुने भन्दै स्थानीय खुसी भएका छन्। यो खुसीको खबरसँगै स्थानीयवासी र यात्रुहरूमा उत्साह थपिएको छ।

प्रदेश तथा संघीय सरकारको समन्वय र बजेटमा निर्माण भएको यो पुलले कर्णालीको पूर्व–पश्चिम सम्बन्ध विस्तारमा समेत महत्त्वपूर्ण योगदान पुर्‍याउने अपेक्षा गरिएको छ। कर्णाली प्रदेशका दुर्गम भूभागमा पूर्वाधार निर्माणका यस्ता प्रयासहरूले जनताको जीवनस्तरमा देखिने गरी सुधार हुने विश्वास गरिएको छ।