सल्यान, साउन २७ । पश्चिम सल्यानको वनगाड कुपिण्डे नगरपालिका–१ अम्रास्थित छिन्चु–जाजरकोट सडकखण्डबाट बोलेरो जिप भेरी नदीमा खस्दा दुई जना बेपत्ता भएका छन् भने दुई जना घाइते भएका छन् ।

बालुवासङ्ग्राहीबाट सल्लिबजारतर्फ जाँदै गरेको लु १ ज ३०२२ नम्बरको जिप बुधबार दिउँसो करिब २ बजे अनियन्त्रित भई सडकबाट करिब २० मिटर तल नदीमा खसेको प्रहरीले जनाएको छ ।

दुर्घटनामा घाइते २९ वर्षीय प्रेम विक र २१ वर्षीय खुमलाल बुढाथोकीको सल्लिबजारस्थित सल्ली सिटी अस्पतालमा उपचार भइरहेको छ । दुवैको अवस्था मध्यम रहेको प्रहरीले जनाएको छ ।

जिपसहित नदीमा बेपत्ता दुई जनाको पहिचान खुल्न सकेको छैन । नेपाल प्रहरी र सशस्त्र प्रहरीको टोलीले उनीहरूको खोजी तथा उद्धार गरिरहेको छ । थप टोली परिचालनका लागि सुर्खेतसँग समन्वय भइरहेको प्रहरीले जनाएको छ ।