काठमाडौं, फागुन २६

प्रमुख विपक्षी नेपाली कांग्रेसका सभापति शेरवहादुर देउवाले माओवादी केन्द्रका अध्यक्ष पुष्पकमल दाहाल प्रचण्डले राखेको प्रधानमन्त्रीको अफर अस्विकार गरिदिनु भएको छ । उहाले कम्युनिष्ट र विशेषगरी प्रचण्डको भर नहुने भएकाले आफु प्रधानमन्त्री नबन्ने स्पष्ट पार्नुभएको हो ।

बुढानीलकण्ठ निवास पुगेका कांग्रेस सम्बद्ध आदिवासी जनजाति नेताहरूसँग भेटमा देउवाले आफ्नो एकमात्र उद्देश्य फेरि पार्टी सभापति हुने रहेकाले प्रधानमन्त्री पदसँग आफ्नो रुचि नरहेको बताउनु भयो । ‘मलाई प्रधानमन्त्रीसँग मतलब छैन र यिनीहरुको (कम्युनिष्‍ट) विश्वास छैन । अहिले जसरी पनि सभापति हुने हो, महाधिवेशनबाट एकपटक पार्टी फेरि हाँक्ने हो’, उहाको भनाई उदृत गर्दै एक जनजाति नेताले भन्नुभयो ।

सभापति देउवाले प्रधानमन्त्री केपी शर्मा ओलीविरुद्ध अविश्वासको प्रस्ताव ल्याउने पनि आफुहरुको रुचि नभएको स्पष्ट पार्नुभयो । उहाले अविश्वासको प्रस्ताव ल्याउने, हटाउने, फेरी विश्वासको मत लिने यस्ता कार्यमा आफ्नो रुचि नभएको बताउनु भयो ।