काठमाडौं, बैशाख ११ । राजश्व अनुसन्धान विभागले दुई अर्ब भन्दा बढी राजश्व छली गरेको अभियोग लागेका १६ जनाविरुद्ध मुद्दा चलाएको छ । झुट्टा तथा नक्कली मूल्य अभिवृद्धि कर (भ्याट) को बीजक प्रयोग गरी राजश्व छली गर्ने समुहको पहिचानसहित बिभागले शुक्रवार मुद्धा चलाएको हो ।

बिभागका अनुसार सर्लाही घर भई ललितपुर बस्दै आएका अनिल गुप्ता एण्ड एसोसियटसका सञ्चालक अनिलकुमार गुप्ता तथा सोही जिल्ला घर भई काठमाडौँ बस्ने अङ्कुश ट्रेड एण्ड सप्लायर्सका सञ्चालक प्रविणकुमार महतोको नेतृत्वमा यसरी अर्बाैंको राजश्व छली भएको हो ।
राजस्व छलीमा गुप्ता र महतोसहित पर्साका रामचन्द्र माझी, भुलावन महरा चमार, दीपककुमार कायस्थ, वकिल देवान, अभिमन महतो, बाराका अकलीहजरा दुसाद, मुअन महरा, काठमाडौँका सरोज श्रेष्ठ, सञ्जय श्रेष्ठ, सर्लाहीका अञ्जु गुप्ता र वाणेश्वर महतो तथा उदयपुरका सरोज ढकाल, राधेश्यामप्रसाद साह, रत्नगोपाल श्रेष्ठ संलग्न रहेको विभागले जनाएको छ ।

लामो अनुसन्धानपछि तथ्य प्रमाणका आधारमा १६ जना प्रतिवादीविरुद्ध उच्च अदालत पाटनमा मुद्दा चलाइएको विभागले जनाएको छ । बिभागका अनुसार प्रतिवादीहरूले दुई अर्ब १९ करोड ८८ लाख रुपैयाँ बिगो बराबरको राजश्व छली गरेकाले बिगो असुल गरी जरिवाना र कैद सजायको दाबी लिई मुद्दा दर्ता गरिएको छ । उनीहरूले विभिन्न फर्मका नाममा बिक्री भएको भनी नक्कली तथा झुट्टा बीजक जारी गरी सो बमोजिमको रकम भुक्तानी लिई असुल गरेको मूल्य अभिवृद्धि कर रकम सरकारी कोषमा दाखिला नगरेको पाइएको हो ।

प्रतिवादीले राजश्व चुहावट (अनुसन्धान तथा नियन्त्रण) ऐन, २०५२ को दफा ३ ले निषेधित एवं सोही ऐनको दफा ४ को खण्ड (क), (ख), र (छ) बमोजिमको कसूर गरी राजश्व चुहावट गरेकोले राजश्व चुहावट (अनुसन्धान तथा नियन्त्रण) ऐन, २०५२ को दफा २(छ) बमोजिम राजश्व चुहावट गरेको विभागले जनाएको छ ।