धनगढी, कात्तिक १४ । नेकपा एकीकृत समाजवादीले सुदूरपश्चिम प्रदेश सरकारको नेतृत्वमा दाबी गर्ने भएको छ । त्यसका लागि समन्वय गर्न पार्टीको केन्द्रीय कमिटीसँग माग गर्ने लिखित निर्णयसमेत भएको छ । एकीकृत समाजवादी पार्टी प्रदेश सभा संसदीय दलका नेता तथा भौतिक पूर्वाधारमन्त्री दीर्घ सोडारीका अनुसार प्रदेश सभामा ठूलो दल भएपछि सरकारको नेतृत्व पाउनुपर्ने माग आएपछि केन्द्रलाई पत्र पठाउने निर्णय गरिएको हो ।

‘एकीकृत समाजवादी पार्टी संसदीय दलको शुक्रबार बसेको बैठकले आफ्नो पार्टीको नेतृत्वमा प्रदेशस सरकार बनाउनुपर्ने माग राख्दै केन्द्रलाई पत्राचार गर्ने निर्णय गरिएको छ,’ संसदीय दलका नेता सोडारीले भन्नुभयो, ‘केन्द्रको रायअनुसार आगामी रणनीति तय हुने छ ।’ उहाँले बैठकका थप निर्णय भने सोमबार पत्रकार सम्मेलन गरेर जानकारी दिइने बताउनु भयो । प्रदेश सभामा नेकपा एस ठूलो दल भएका कारण सरकारको नेतृत्वका लागि दाबी गर्नु स्वाभाविक भएको उहाँको भनाई छ ।

एकीकृत समाजवादीका अध्यक्ष माधव नेपालले सुदूरपश्चिममा आउँदा पनि त्यसको केही संकेत देखाउनु भएको थियो । गत बिहीबार कञ्चनपुर पार्टी कार्यालय उद्घाटन गर्न सुदूरपश्चिम आउने क्रममा अध्यक्ष नेपालले धनगढी विमानस्थलमा आयोजित पत्रकार सम्मेलनमा सरकार परिवर्तन भए ठूलो दलका हैसियतले त्यसको नेतृत्व नेकपा एसले गर्ने बताउनु भएको थियो ।

माधवकै निर्देशनपछि प्रदेश कमिटीले मुख्यमन्त्रीको दावी गरेको हो । यता कर्णालीमा नेपाली कांग्रेससँग आलोपालो सरकार चलाउने सहमतिअनुसार माओवादी केन्द्रलाई छाडन चर्काे दवाव परेको छ । पछिल्लो घटना क्रममा नेकपा एकीकृत समाजवादी र कांग्रेसले दुवै प्रदेशबाट मुख्यमन्त्री हटाएर माओवादीलाई सून्य पार्ने रणनीति अघि बढाएको देखिएको छ ।