भैरहवा, फागुन ३ । नेकपा एमालेका उपाध्यक्ष विष्णु पौडेलले जनताले सरकारको अनुभुति नै गर्न नपाएको बताउनु भएको छ । एमाले रुपन्देहीले धकधईमा आयोजना गरेको पार्टी प्रवेश कार्यक्रममा पूर्वउपप्रधानमन्त्री पौडेलले साढे ३ वर्ष केपी ओलीको सरकार रहँदा जनताले सरकारको अनुभुति गरे पनि अहिलेको सरकार छ(छैन भनेर जनताले अनुभुति नै गर्न नपाएको बताउनुभयो ।

‘गठबन्धन सरकार सम्पूर्ण रुपमा असफल छ, यो सरकारले न त विकास गर्न सकेको छ, न त शान्ति सुरक्षा दिन,’ उहाँले भन्नुभयो । सरकारले देशलाई आर्थिक संकटमा पुर्‍याएको तथ्य पनि उहाँले राख्नुभयो । पौडेलले भन्नुभयो, ‘देशमा विदेशी मुद्राको संचिति सकिएको छ, महँगी बढेको छ । पुजीगत खर्च हुन सकेको छैन ।’

स्थानीय तहको निर्वाचन हुन नदिन गठबन्धनकै दलहरुले कोसिस गरिरहेको पनि उहाँले बताउनु भयो । यो निर्वाचन रोक्न र छेक्न भित्रबाट अनेक कोसिस अझै पनि भइरहेको बताउँदै नेता पौडेलले कुनै पनि बहानामा निर्वाचन रोक्ने नदिइने अडान राख्नुभयो ।