एजेन्सी । भारतीय प्रधानमन्त्री नरेन्द्र मोदीसँग २.२३ करोड भारुभन्दा बढीको सम्पत्ति देखिएको छ । अधिकांश सम्पत्ति बैंक निक्षेपको रूपमा छ। गुजरातको गान्धीनगरमा आफ्नो जग्गा दान गरेकाले प्रधानमन्त्रीसँग अहिले कुनै अचल सम्पत्ति छैन। यो जग्गाको मूल्य १ करोड १ लाख थियो ।

प्रधानमन्त्री कार्यालय (पीएमओ) को वेबसाइटमा प्रधानमन्त्रीको सम्पत्ति विवरण सार्वजनिक भएपछि यो जानकारी सार्वजनिक भएको हो । जानकारी अनुसार ३१ मार्च २०२२ सम्म उनको कुल सम्पत्ति २ करोड २३ लाख ८२ हजार ५०४ रुपैयाँ थियो । योसँगै मोदीको चल सम्पत्ति गत वर्षको तुलनामा २६.१३ लाखले बढेको छ ।

गत वर्ष १.१ करोडको अचल सम्पत्ति थियो
प्रधानमन्त्रीले कुनै ऋणपत्र, सेयर वा म्युचुअल फण्डमा लगानी गरेका छैनन्, उनीसँग सवारी साधनसमेत छैन । प्रधानमन्त्रीसँग ४ वटा सुनको औँठी छ, जसको मूल्य १ लाख ७३ हजार रुपैयाँ छ । मार्च ३१, २०२१ सम्म, प्रधानमन्त्रीको १.१ करोड रुपैयाँको अचल सम्पत्ति थियो ।

मोदीले दान गरेको जग्गाको अंश गुजरातको मुख्यमन्त्री हुँदा अक्टोबर २००२ मा किनिएको थियो । यस जग्गामा थप ३ जनाको पनि स्वामित्व थियो । यसमा प्रधानमन्त्रीको चौथो (२५ प्रतिशत) हिस्सेदारी थियो, जुन उनले दान गरेका थिए ।

१.८९ लाख जीवन बीमा
मार्च ३१, २०२२ सम्म, प्रधानमन्त्रीसँग जम्मा ३५ हजार २५० रुपैयाँ नगद थियो । यसैबीच हुलाक कार्यालयमा उनको नाममा ९ लाख ५ हजार १०५ रुपैयाँ बराबरको राष्ट्रिय बचत प्रमाणपत्र जम्मा छ । मोदीसँग १ लाख ८९ हजार ३०५ रुपैयाँको जीवन बीमा पनि छ ।

सबै क्याबिनेट मन्त्रीहरूले सम्पत्ति विवरण दिए
गत आर्थिक वर्षमा सबै २९ मन्त्रीले आफ्नो र आश्रितको सम्पत्ति विवरण सार्वजनिक गरेका थिए । रक्षामन्त्री राजनाथ सिंहसँग २.५४ करोड रुपैयाँको चल सम्पत्ति र २.९७ करोड रुपैयाँको अचल सम्पत्ति छ। धर्मेन्द्र प्रधान, ज्योतिरादित्य सिन्धिया, आरके सिंह, हरदीप सिंह पुरी, पुरुषोत्तम रुपाला र जी किशन रेड्डी पनि यस पटक सम्पत्ति घोषणा गर्नेहरूमा छन्। मुख्तार अब्बास नक्वीले पनि आफ्नो सम्पत्ति घोषणा गरेका छन् । नक्वीले जुलाईमा मन्त्री पदबाट राजीनामा दिएका थिए। अहिले केन्द्रमा २८ जना क्याबिनेट मन्त्री छन् ।