काठमाडौं, मंसिर २५ । नेकपा माओवादी केन्द्रले चर्चित नेता अजम्बर काङमाङलाई गम्भीर घोखा दिएको छ । नेकपा एमाले छाडेर नेकपा माओवादी केन्द्रमा पुग्नुभएका नेता काङमाङलाई प्रतिनिधिसभाको समानुपातिकतर्फको पहिलो नम्बरमा राखेर मत मागे पनि निर्वाचन आयोगमा सूची बुझाउने बेला काटिएको हो ।

जनयुद्धकालिन मानिस नभएको कारण माओवादीले क्षमतावान र जनतामाझ प्रिय भए पनि सांसद बनाउने योग्यता नपुगेको भन्दै अन्तिम समयमा हटाएको हो । अजम्बर नेकपा एमालेमा रहँदा ठूलो सम्भवाना बोकेका नेताका रुपमा परिचित हुनुहुन्थ्यो । एमाले छाडेर माओवादीमा पुगेपछि भने उहाँलाई सधै धोकाधडी हुन थालेको छ । स्वयं उहाँले आज समाजिक सञ्जाल फेसबुकमा प्रचण्डसहितको तस्विर सार्वजनिक गर्दै निकै मार्मिक कुरा लेख्नुभएको छ ।

नेकपा एमालेको भातृसंगठन प्रजातान्त्रिक युवा संघ नेपालका अध्यक्षसमेत बनिसकेका अजम्बर अशोक राई नेतृत्वको संघीय समाजवादी पार्टीतर्फ लागेपछि उतारचढावपूर्ण राजनीति सुरु भएको हो । राई नेतृत्वको पार्टी उपेन्द्र यादवको फोरममा विलय हुँदा अजम्बर केन्द्रीय सदस्यको हैसियतमा हुनुहुन्थ्यो । पार्टी एकता हुँदा पाएको जिम्मेवारीमा असन्तुष्टि जनाएपछि उहाँले सचिवको जिम्मेवारी पाउनु भयो ।

संघीय समाजवादी फोरम केन्द्रीय सचिव काङमाङ २०७४ मा नेकपा माओवादी केन्द्रमा प्रवेश गर्नुभयो । त्यसपछि एमाले र माओवादी एक हुँदा उहाँ पनि नेकपाको केन्द्रीय सदस्य हुनुभयो । नेकपा विभाजित भएपछि उहाँ पुरानो पार्टी एमालेतिर आउनु भएन । आएको भए उहाँका लागि निकै फलिफाप हुने अहिलेको घटनाक्रमले देखिएको छ ।

संघीय समाजवादीमा रहँदा अघिल्लो अर्थात २०७४ को चुनावमा कांग्रेसको समर्थनमा भोजपुर प्रदेश सभामा ‘क’ बाट लडेर हार्नुभएको थियो । त्यसबेला एमाले नेता राजेन्द्र राईसँग पराजित हुनुभएका अजम्बर यसपटक भने एमाले छाडेका उनै राजेन्द्र राईलाई जिताउन सक्रिय बन्नुभयो । गठबन्धनलाई जिताउन ठूलो मिहिनेत गरेका अजम्बर सूचीको पहिलो नम्बरमा रहेर पनि माओवादीबाट पत्याइएनन्। बरु माओवादीले आदिवासी जनजाति महिलातर्फ पहिलो नम्बरमा रहेकी भोजपुरकै दुर्गा राईलाई समानुपातिक सांसद बनाएर अजम्बरमाथि घात गरेको छ । भोजपुरमा एमाले हराउने मिसन अजमबर सफल बने पनि आफै भने असफल बन्नु परेको छ ।

अजम्बरकै भनाईमा पनि उहाँ आफू आदिवासी जनजाति पुरुषतर्फ माओवादी केन्द्रबाट पहिलो नम्बरमा रहेकाले समानुपातिक सांसद बन्नेमा ढुक्क हुनुहुन्थ्यो । भोजपुरकै अर्का माओवादी नेता सावित्री काफ्ले ’समर’लाई लिएर आज खुमलटार जानुभएका अजम्बरले प्रचण्डसँगको संवाद उधृत गर्दै लेख्नुभएको छ, ‘म पनि बन्छु भन्नेमा विश्वस्तै थिएँ, तपाईंले एक प्रतिशत मात्रै मेरो पक्षपोषण गरिदिनुभएको भए एकाउन्न प्रतिशत हुनेमा म परिहाल्थ्येँ ।’

प्रचण्डको भेटपछि अजम्बरले लेख्नुभएको भनाई निकै मार्मिम रहेको छ । आफ्नो भनाईको अत्य गर्दै अजम्बरले लेख्नुभएको छ, ‘माओवादीमा तेरो सेन्ट अप परीक्षा पाइला पाइलामा अझै छ अजम्बरे !’ मन न हो, Bhupal Rai कृत ‘नुमाफुङ’ सिनेमाको गीतांश सम्झेँ-‘…पाइलाभन्दा घुम्ति धेरै मेरो कहानीमा…!’