जनता टाइम्स

१४ चैत्र २०७९, मंगलवार १९:५५

जनताबाट अनुमोदित भएका योजना सरकारको प्राथमिकतामा : मुख्यमन्त्री शाह


धनगढी, १४ चैत । सुदूरपश्चिम प्रदेशका मुख्यमन्त्री कमलबहादुर शाहले जनताबाट अनुमोदन भएका योजनालाई मात्र प्रदेश सरकारले प्राथमिकतामा राख्ने बताउनुभयो । अछामका विभिन्न कार्यक्रममा सहभागी हुन पुगेका मुख्य मन्त्री शाहले आज साँफेबगर नगरपालिकाले आयोजना गरेको कार्यक्रममा प्रदेश सरकारलाई आम नागरिकको सरकार बनाउनतर्फ आफ्नो नेतृत्व लागिपरेको बताउनुभयो ।

मुख्यमन्त्री शाहले प्रदेशका योजनाका बारेमा स्थानीय सरकारलाई जानकारीबिना अब कुनै पनि योजना पास नगर्ने भन्दै सामूहिक रुपमा आएको साझा योजनालाई प्राथमिकतामा राखेर बजेट बिनियोजन गराउने बताउनुभयो ।

उहाँले भन्नुभयो,‘अब व्यक्तिगत योजना पास हुनेवाला छैनन्, वडा तहमा बढिभन्दा बढि जनताको सहभाीतामा पास भएको योजना आउनु पर्यो, स्थानीय सरकारलाई गुमराहमा राखेर कुनै पनि योजना बजेट प्रदेश सरकारबाट आउने छैन, स्थानीय सरकारलाई पनि बलियो बनाउनतर्फ मेरो जोड छ, स्थानीय सरकारसँग समन्वय गरेर प्रदेश सरकारले आफ्ना क्रियाकलाप गर्ने छ ।’

मुख्यमन्त्री शाहले साना साना टुक्रे योजना, व्यक्तिगत योजना र कमिस र झ्यालबाट आउने योजनाको अन्त्य आफ्नो कार्यकालमा हुने र यसका लागि कर्मचारी जनप्रतिनिधिबीच सहकार्य आवश्यक रहेको बताउनुभयो । उहाँले भ्रष्टाचार नियन्त्रण र सुशासन पक्षमा कोहि कसैसँग पनि सम्झौता गर्ने बताउनुभयो ।

यस्तै सुदूरपश्चिम प्रदेशका भौतिक पूर्वाधार विकासमन्त्री प्रकाश देउवाले पहाडको बसाइसराई रोक्न यहाँका आधारभूत आवश्यकता परिपूर्ति गर्नतर्फ लाग्नु पर्नेमा जोड दिनुभयो । उहाँले यहाँको शिक्षा,स्वास्थको आधारभूत आवश्यकता र रोजगारको क्षेत्रमा विशेष योजना बनाएर अगाडि बढ्न सके मात्र बसाइसराई रोक्न सकिने बताउनुभयो । यसो हुन नसके अबका केहि वर्षमा पहाडका गाउँबस्ती रित्तिने बताउनुभयो ।

उहाँले भन्नुभयो,‘स्वास्थमा सहज पहुँच, शिक्षामा गुणस्तर र गाउँघरमै रोजगार, यहाँको पर्यटन प्रबर्धन,पूर्वाधार जस्ता विषयलाई जोडेर काम गर्न जरुरी छ, तब मात्र केहि हदसम्म बसाइसराई रोकिन्छ, योजनाबद्ध तरिकाले अगाडि बढ्छौं, तपाईं सबैको साथ सहयोग चाहिन्छ, यो तेरो, यो मेरो भन्ने भावना त्यागेर हाम्रो हो भन्नेमा एक मत हुनुपर्यो । अनि मात्र तपाईं हामीले चाहेको विकास सम्भव छ ।’ मन्त्री देउवाले सुदूरपश्चिम प्रदेशको विकास र समृद्धिका लागि नयाँ सोच र योजना बनाएर अहिलेको सरकारले विकासको नमूना खडा गर्ने दावी गर्नुभयो ।