काठमाडौं, भदौ २०। नेकपा एमालेका अध्यक्ष केपी शर्मा ओलीले मानव बेचविखन तथा ओसारपसार गर्ने मानवता विरोधी प्रवृत्तिका विरुद्ध एकजुट भएर लाग्न सबैमा आह्वान गर्नुभएकाे छ ।

मानव बेचविखनविरुद्धको १७औं राष्ट्रिय दिवसका अवसरमा आज शुभकामना सन्देश दिँदै अध्यक्ष ओलीले मानव बेचविखन तथा ओसारपसार गर्ने मानवता विरोधी प्रवृत्तिका विरुद्ध एकजुट भएर लाग्न आह्वान गर्नुभएको हो । मानव सभ्यताको कलंका रूपमा रहेको मानव बेचविखन तथा ओसारपसार विरुद्ध सचेतना र सक्रियताका लागि पनि उहाँले सबैमा आह्वान गर्नुभएको छ ।

सामाजिक न्याय, मानवता, नागरिकको समान अधिकार र अवसरका लागि आन्दोलनको अगुवाई गरेको पार्टी भएको उल्लेख गर्दै अध्यक्ष ओलीले मानव बेचविखन तथा ओसारपसार विरुद्धका हरेक अभियानमा पार्टी निष्ठापूर्वक समर्पित रहेको उल्लेख गर्नुभएको छ ।

उहाँले यौन शोषण, बाध्यात्मक श्रम, दासता, जोखिमपूर्ण कार्यको नियन्त्रणका लागि राज्यको स्तरबाट नीतिगत, कानुन र संरचनागत आधार तयार गर्न र सामाजिकस्तरबाट सचेतनागत अभियान सञ्चालन गर्न आग्रह गर्नुभएकाे छ । मनोरञ्जन, वैदेशिक रोजगारी, घरेलु काम, मानव अंग प्रत्यारोपण लगायत विभिन्न कार्यका लागि मानव खासगरी महिला तथा बालबालिकाको बेचबिखन हुने गरेको अध्यक्ष ओलीले उल्लेख गर्नुभएकाे छ ।

अन्तरदेशीय संगठित अपराधका रूपमा रहेको मानव बेचबिखन तथा ओसारपसारका घटना अहिले पनि कम हुन सकेका नसकेका उल्लेख गर्दै उहाँले नेपाल पनि यस अमानवीय समस्याबाट प्रभावित भएकाे लेख्नुभएकाे छ । अपराधजन्य यस कार्यमा संलग्न पक्षले समाजमा रहेको गरिबी, बेरोजगारी र पछौटेपनको फाइदा उठाइरहेका उहाँले उल्लेख गर्नुभएकाे छ ।