हङकङ, भदौ २३ । गैरआवासीय नेपाली संघ अन्तर्राष्ट्रिय समन्वय परिषद (एनआरएनए) का उपाध्यक्ष आरके शर्माले स्पष्ट भिजनसहित एनआरएनएको नेतृत्व गर्न तयार भएको बताउनु भएको छ ।

एनआरएनए एनसीसी हङकङले आयोजना गरेको अन्तरक्रियामा आगामी महाधिवेशनमा अध्यक्षका प्रत्यासीसमेत रहेका शर्माले देश विकास गर्ने भिजन लिएर आफू एनआरएनए नेतृत्वको लागि अगाडि बढेको बताउनु भएको हो ।

‘एनआरएनएको नेतृत्व लिने तयारी मैले पैसालाई साथ लिएर गरेको छैन,’ शर्माले हकङकङका एनआरएनए अभियन्ताहरूसँगको छलफलमा भन्नुभयो, ‘मेरो भिजन भनेको विदेशमा बस्ने केही हजार नेपालीलाई होइन, लाखौँ श्रमिक नेपालीलाई धनी बनाउने हो र उनिहरुलाई स्वदेश फर्काउने नै रहेको छ ।’

शर्माले मध्यपूर्वलाई क्षेत्रीय संयोजक मात्र दिए हुन्छ, उपाध्यक्ष दिए हुन्छ अध्यक्ष पर्दैन भन्ने नसोच्न समेत सबै अभियन्तालाई अनुरोध गर्नुभयो ।
‘२० वर्ष अगाडि अभियानको सुरुवात अन्तर्गत रसियामा पहिलो एनसीसी खुलेपछि दोस्रो कतारमा खुलेको हो,’ शर्माले भन्नुभयो, ‘मैले मध्यपूर्वमा बस्ने श्रमिक हुन या अमेरिका बेलायतमा बस्ने डाक्टर हुन, सबैलाई अपनत्व हुने गरेर नेतृत्व लिने तयारी गरेको छु ।’

शर्माले श्रमिक वर्गको हित तथा देश विकासको लागि सरकारको सहभागितामा सामूहिक लगानी कोषको अवधारणा आफूले अगाडी बढाएको बताउनु भयो । अहिले वार्षिक १३ खर्ब रेमिट्यान्स भित्रने गरेकोमा त्यसलाई प्रोत्साहन गर्न सकेमा थप १० खर्ब रुपैयाँ औपचारिक माध्यमबाट भित्रने भन्दै सरकारको सहभागितामा प्राधिकरण गठन गर्नुपर्ने आवश्यक्ता पनि उहाँले औल्याउनु भयो ।

अहिलेसम्म अभियानले सामाजिक कामको नेतृत्व गरेको भन्दै शर्माले आफूले सामाजिक कामलाई निरन्तरता दिएर आर्थिक मुद्दामा एनआरएनएलाई हिडाउने मिसन बोकेको बताउनु भयो । ‘खाडीका मलेसिया, कोरिया र युरोपमा बस्नेले सिप सिकेर फर्केका छन, अमेरिकामा बस्ने डाक्टरलाई पब्लिक हेल्थको बारेमा जानकारी छ,’ शर्माले थप्नुभयो, ‘हामीले सबै विदेश बस्ने नेपालीलाई अभियानमा जोडेर नेपाललाई विकसित बनाउने योजना नै हो।’

उहाँले हङकङ एनसीसीले कोभिडको समयमा नेपालमा निकै ठूलो काम गरेको भन्दै आफू स्वायत्त एनसीसीको पक्षमा रहेको प्रष्ट पार्नुभयो ।शर्माले गैरआवासीय नागरिकता जारी हुनु अभियानको उपलब्धी भएको भन्दै यसमा थप सुधार गर्दै लैजान आफूले काम गर्ने प्रतिबद्धता पनि जनाउनु भउको छ । ‘गोर्खाजका मुद्दालाई टुंगोमा लग्न म जहिले पनि लागिरहेको छु, यो टुंगोमा नपुग्दासम्म म तपाईंहरूको साथमा हुनेछु,’ शर्माले भन्नुभयो ।

अहिलेको कार्यसमितिका अध्यक्षत्रय सम्मानित व्यक्तिहरू रहेकोले सहज निर्वाचन गरेर अरूलाई नेतृत्व हस्तान्तरण गर्नेमा आफू ढुक्क रहेको पनि शर्माले बताउनु भयो । एनआरएनएमा हाल डा. बद्री केसी, कुल आचार्य र रबिना थापा अध्यक्ष हुनुहुन्छ । एनआरएनएको विश्व सम्मेलन आगामी अक्टोबरको दोस्रो साता काठमाडौँमा हुदैँ छ ।

अध्यक्षका प्रत्यासी शर्मा विश्वभरका गैरआवासीय नेपाली अभियन्तासँग अन्तरक्रिया तथा सुझाव लिन हङकङ आइपुग्नुभएको हो । शर्माले यस अभियानका क्रममा एसिया, मध्यपुर्व, युरोप, अस्ट्रेलिया, अमेरिका क्षेत्रको स्थलगत अध्ययन गरेर गैर आवासीय नेपालीहरु र अभियन्ताहरुको सल्लाह सुझाव लिएर आगामी नेतृत्वको लागी तयार भएको बताउनु भएको छ ।