मकवानपुर, २९ पुस । करिब ८ किलो ८ सय ग्राम अवैध लागुऔषध चरेशसहित ५ जनालाई प्रहरीले पक्राउ गरेको छ । पक्राउ पर्नेहरूमा मनहरी गाउँपालिका–६ नयाँबस्ती बस्ने ४० वर्षीय रामनारायण श्रेष्ठ, बारा जितपुर सिमरा उपमहानगरपालिका–६ बस्ने २१ वर्षीय याकुब खान, बारा परवानीपुर गाउँपालिका–३ बस्ने २० वर्षीय मुकेश राम भन्ने मुस्की राम, पर्सा वीरगज उपमहानगरपालिका–२१ बस्ने २० वर्षीय ईरमान आलम र सोही ठाउँ बस्ने २१ वर्षीय सोयल मियाँ रहेका छन् ।

इलाका प्रहरी कार्यालय मनहरीबाट खटिएको प्रहरीले मनहरी गाउँपालिका–७ मा चितवनबाट हेटौंडातर्फ आउँदै गरेको ना३च ७४०४ नम्बरको कारमा सवार याकुब खानलाई तीन सय ग्राम चरेशसहित पक्राउ गरेको थियो । थप अनुसन्धानको क्रममा खानले उक्त लागुऔषध रामनारायणसँग लिएको खुल्न आएपछि उनको घरबाट थप ८ किलो ५ सय ग्राम चरेश बरामद भएको मकवानपुर प्रहरीले जनाएको छ । यस सम्बन्धमा प्रहरीले आवश्यक अनुसन्धान गरिरहेको छ ।