जनता टाइम्स

१ चैत्र २०८०, बिहीबार ०८:०१

काठमाडौंमै नाबालिकालाई मदिरा सेवन गराउँदै यौनधन्दा सञ्चालन, समातिए होटल सञ्चालक


सुरूमा सफाइको काममै लगाउँथे, पछि फकाएर खाजा घरमा आएका ग्राहकसँग मादक पदार्थ सेवन गराउँथे, खाजा घरमा आउने ग्राहकलाई बालिकाहरू रोज्न लगाउँथे। रोजेकी बालिकालाई ग्राहकसँग शारीरिक सम्पर्क राख्न दबाब दिन्थे

काठमाडौं, चैत १। होटल तथा खाजा घर सञ्चालन गरी नाबालिकालाई यौनधन्दामा लगाएको आरोपमा प्रहरीले एक जनालाई पक्राउ गरेको छ।

पक्राउ पर्नेमा उदयपुर घर भई हाल काठमाडौं बस्ने ३८ वर्षीय हिरन राई छन्। उनलाई बुधबार मानव बेचबिखन तथा ओसारपसार ब्यूरोले पक्राउ गरेको हो। ब्युरो प्रवक्ता प्रहरी उपरीक्षक ज्ञानेन्द्र फुयाँलका अनुसार गोकर्णेश्वर नगरपालिका ५ शिवचोकमा राईले कालिञ्चोक स्टाफ होटल तथा खाजा घर सञ्चालन गर्दै आएका थिए ।

प्रहरी उपरीक्षक फुयाँलका अनुसार उक्त होटलबाट दुई जना नाबालिकालाई उद्धार गरिएको छ। प्रारम्भिक अनुसन्धान अनुसार राईले आर्थिक अवस्था कमजोर भएका नाबालिकालाई होटलमा ल्याउने गरेका थिए। ग्रामीण भेगका ती नाबालिका कम पढेलेखेका हुन्थे। उनले खाजा घरमा ल्याएर सरसफाइको काम लगाइदिने, आकर्षक तलब सुविधा दिन्छु भन्ने गरेका थिए।

‘सुरूमा सफाइको काममै लगाउँथे, पछि फकाएर खाजा घरमा आएका ग्राहकसँग मादक पदार्थ सेवन गराउँथे,’ प्रवक्ता फुयाँलले भन्नुभयो, ‘ग्राहकहरूसँगै खाने बस्ने र बढी बिल उठाउने काममा लगाउने गरेको खुलेको छ।’ राईले खाजा घरमा आउने ग्राहकलाई बालिकाहरू रोज्न लगाउँथे। रोजेकी बालिकालाई उनले ग्राहकसँग शारीरिक सम्पर्क राख्न दबाब दिन्थे।

‘बालिकाहरूलाई खाजा घरमा कोठा निर्माण गरी सोही स्थानमा र ग्राहकको माग तथा परिस्थिति अनुसार पहिल्यै रकम लिई अन्यत्र समेत बेश्यावृत्तिका लागि पठाई आर्थिक लाभ खाजा घर सञ्चालकले लिने गरेको खुल्न आएको छ,’ फुयाँलले भने।

यस घटनामा संलग्न अन्य प्रतिवादीहरूको खोजतलास तथा थप अनुसन्धान भइरहेको उहाँले बताउनु भयो। राईलाई अदालतबाट हिरासतमा राख्न अनुमति लिई अनुसन्धान थालिएको छ।