१४ आश्विन २०७६, मंगलबार ००:००

सभामुख महरा प्रकरण : महरालाई राजिनामा गर्न सुझाव दिने नेकपाको तयारी, सचिवालय बैठक बोलाइयो


काठमाडौं, असोज १४

सभामुख कृष्णबहादुर महरामाथी लागेको गम्भिर आरोपका विषयमा सत्तारुढ नेपाल कम्युनिष्ट पार्टीले राजिनामा गरेर अनुसन्धानमा सहयोग गर्न आग्रह गर्ने भएको छ । दुई अध्यक्षबीच आज विहान प्रधानमन्त्री निवास बालुवाटारमा भएको छलफलले राजिनामा दिएर अनुसन्धानमा सहयोग गर्ने निष्कर्षमा पुगेको स्रोतले दावी गरेको छ ।

दुई अध्यक्षको निष्कर्षपछि अहिले विहान ११ बजे सचिवालय बैठक बोलाइएको छ । सचिवालयले बैठकले आधिकारीक निर्णय गरेपछि महरालाई सो जानकारी गराइने भएको एक सचिवालय सदस्यले जानकारी दिनुभएको छ । अध्यक्षद्वय केपी शर्मा ओली र पुष्पकमल दाहाल प्रचण्डले आरोप लागेका महरासँग कुराकानी गरेपछि महराबाट गल्ती भएको निष्कर्षमा नेताहरू पुगेको खुमलटारस्रोतले जानकारी दिएको छ ।

महरामाथि एकजना महिलाले लगाएको यौन दुर्व्यवहारको आरोपको छानबिनका लागि सहज वातावरण बनाइ दिन आफू तयार संकेतपनि सभामुख महराले दिइसकेको स्रोतले बताएको छ । खुमलटार स्रोतका अनुसार महरालाई मार्ग प्रसस्त गरेर छानविनमा सहयोग गर्न लगाउने निर्णय भएको बताइएको छ ।

उच्च स्रोतका अनुसार महराको आजै साँझसम्म राजिनामा आउने सम्भावना बलियो रहेको छ । राजिनामा आएपछि प्रहरीले घटनाका विषयमा थप अनुसन्धान शुरु गर्नेछ ।