काठमाडौं, २ भदौ । थाइल्याण्डका पूर्वप्रधानमन्त्री थाक्सिन सिनावात्रालाई राजाले आममाफी दिनुभएको छ । उहाँको पेरोल आज सकिन लागेकोमा राजाले उहाँलाई आममाफी दिएको बैंकक पोष्टले उल्लेख गरेको छ ।

अघिल्लो महिना राजाको जन्मदिनको अवसरमा असल आचरण भएका ७५ सय कैदीहरूलाई शाही माफीको अंशको रूपमा थाक्सिनलाई माफी दिइएको रिपोर्टमा उल्लेख छ । थाक्सिनकी छोरी ३७ वर्षीया पातोङटार्न सिनावात्रा थाइल्याण्डको सबैभन्दा कान्छी प्रधानमन्त्री बनेको एक दिनपछि यो समाचार आएको हो ।

उहाँ यो पद सम्हाल्ने शिनावात्रा परिवारकी तेस्रो सदस्य पनि हो । ७५ वर्षीय थाक्सिन १५ वर्षको आत्मनिर्वासनपछि गत अगस्टमा थाइल्याण्ड फर्केका थिए, उहाँ राजनीतिक रूपमा प्रेरित भएको भन्दै विभिन्न आरोपमा निष्पक्ष सुनुवाइ हुन नसकेको दाबी गर्दै सन् २००८ मा देशबाट भाग्नुभएको थियो । बैंकक फर्केको दिन, थाक्सिनलाई २००१ देखि २००६ सम्म सत्तामा रहँदा स्वार्थको द्वन्द्व र अख्तियारको दुरुपयोगको आरोपमा एक वर्षको जेल सजाय सुनाइएको थियो ।

उहाँले छ महिना प्रहरीको सामान्य अस्पतालमा बिताएपछि स्वास्थ्य अवस्था र आधा सजाय भोगेको तथ्यको आधारमा फेब्रुअरीमा पेरोलमा बाहिर आउनुभएको थियो । उहाँलाई प्रत्यक्ष राजनीतिक गतिविधिमा संलग्न नहुने शर्तमा पेरोल दिइएको थियो ।

अहिले आम माफी पाएपनि थाक्सिनको कानुनी समस्या पूर्ण रूपमा समाप्त भएको भने छैन । सन् २०१५ मा दक्षिण कोरियाली अखबारलाई दिएको अन्तर्वार्ताको सम्बन्धमा उहाँ अझै पनि लेस–मजेस्टेको आरोपको सामना गरिरहनुभएको छ । यस आरोपमा थाक्सिन धरौटीमा रहनुभएको छ । परीक्षणको मिति अझै तय गरिएको छैन ।