जनकपुर, २७ जेठ । प्रधानमन्त्री केपी शर्मा ओलीले विद्वान पुर्खाका सन्तान भएकाले नेपाली विद्यार्थीको ‘जेनेटिक पावर’ सशक्त रहेको बताउनुभएको छ ।

राजर्षि जनक विश्वविद्यालयको प्रथम दीक्षान्त समारोहलाई मंगलबार सम्बोधन गर्दै विश्वविद्यालयका कुलपति ओलीले नेपालका विश्वविद्यालयबाट दीक्षित विद्यार्थीहरूले संसारको जुनसुकै विश्वविद्यालयमा गएर प्रतिस्पर्धा गर्न सक्ने विश्वास व्यक्त गर्नुभयो । ‘नेपाल ज्ञानको भूमि हो, शैव र विश्वामित्रजस्ता पुरानो सभ्यता भएको मुलुक हो, विश्वको पहिलो आयुर्वेदाचार्य चरक ऋषि यही देशका हुन्, न्युटनले गुरुत्वाकर्षणको सिद्धान्त पत्ता लगाउनुअघि हाम्रा भाष्कराचार्यले ‘सिद्धान्त शिरोमणि’ पुस्तक विसं १२१० मा निकालेका थिए’, ओलीले भन्नुभयो ।

ओलीले पूर्वीय दर्शन अन्धविश्वासमा आधारित हो भन्ने भ्रम दिन खोजिएको बताउँदै त्यो सही नभएको स्पष्ट पार्नुभयो । ‘यो त सिद्धान्त हो, अनुभूति, अनुभव र ज्ञानको सङ्ग्रहबाट सिद्धान्त बन्छ भन्ने आधारमा यो दर्शन रहेको छ, यस दर्शनका हिमायतीहरू विश्वमा कमजोर हुन सक्दैनन्’, उहाँले भन्नुभयो ।

प्रधानमन्त्री ओलीले दीक्षित विद्यार्थीलाई मेहनत गरेमा सफलता हात लाग्ने बताउनुभयो । रुचिको विषय पढ्ने अवसर प्राप्त भएमा हरेक विद्यार्थीले आफूभित्रको सम्भाव्यता प्रस्फुटित गराउने सक्ने उहाँले प्रष्ट पार्नुभयो । ‘तपाईँहरूले यहाँ पाउनुभएको ज्ञान र दीक्षाका आधारमा तपाईँहरू संसारको जुनसुकै विश्वविद्यालयमा प्रतिस्पर्धामा जान सक्नुहुन्छ, तपाईँहरुमा म पठित छु भन्ने घमण्ड होइन, मानवता र करुणाको भावना हुनुपर्छ, विद्याले विनयशीलता विनयशीलताले राम्रो पात्रता, पात्रताले धन  र धनले सुख दिन्छ’, ओलीले भन्नुभयो ।

विभिन्न सङ्काय र तहका १ सय २५ विद्यार्थी दीक्षित भएको समारोहमा वरिष्ठ साहित्यकार डा राजेन्द्र विमलले दीक्षान्त मन्तव्य व्यक्त गर्नुभएको थियो ।