मुगु, मंसिर ११

आफ्नो अभिभावकत्व ग्रहण गर्ने प्रधानमन्त्री केपी शर्मा ओली बिरामी भएको सुनेर उहाकी छोरी ठिल्ले साङमू चिन्तित बनेकी छन् । यद्यपी उनले प्रधानमन्त्री ओलीलाई स्वास्थ्य लाभको कामना गरेकी छन् ।

२०७५ वैशाख १ गते ओलीले अभिभावकत्व प्रदान गर्दै विद्यालय भर्ना गरेपछि उनि निक्कै राम्रोसँग अध्ययन गरिरहेकी छन् । माग्रीगाउँकी ९ वर्षीया यी बालिका र उनका अभिभावकले प्रधानमन्त्री ओली बिरामी भएको खबर पाएपछि स्वास्थ्यलाभको कामना गरिरहेका छन् ।

‘अस्पतालमै गएर त भेट्न सकिँदैन होला, तैपनि हामीले भगवान बुद्धसँग छिटो निको होस् भनेर कामना गरिरहेका छौं,’ ठिल्लेका ७८ वर्षीय हजुरबुवा कार्माछेवाङ तामाङले भन्नुभयो, ‘कसैले काठमाडौं पुर्‍याइदिए त भेटेरै भलाकुसारी गर्न हुन्थ्यो ।’ रेडियोबाट प्रधानमन्त्री बिरामी भएको खबर थाहा पाएपछि नातिनी पनि चिन्तित भएकी उहाले सुनाउनु भयो ।

२ कक्षामा अध्ययन गरिरहेकी ठिल्लेको पनि प्रधानमन्त्री भेट्ने इच्छा व्यक्त गरेकी छन् । प्रधानमन्त्री ओलीले ओलीले उनको लागि स्टेसनरी, पोशाक, खाजाको लागि विगत दुई वर्षदेखी प्रत्येक महिना पैसा पठाइरहनु भएको छ ।