काठमाडौं, मंसिर १८ । सत्तारुढ नेपाल कम्युनिष्ट पार्टी (नेकपा) का अध्यक्ष पुष्पकमल दाहाल, प्रचण्डले सचिवालय बैठक बोलाउनु भएको छ । कार्यकारी अध्यक्षको जिम्मेवारी पाएपछि अध्यक्ष प्रचण्डले आज पहिलो पटक सचिवालय बैठक बोलाउनु भएको हो ।
प्रधानमन्त्री तथा अर्का अध्यक्ष केपी शर्मा ओलीसँग सहमति लिएर प्रचण्डले सचिवालय बैठक बोलाउनु भएको हो । गत मंसिर ४ गते बसेको सचिवालय बैठकले दुई अध्यक्षकोकार्यबिभाजन गर्दै प्रधानमन्त्रीसमेत रहनुभएका अध्यक्ष ओलीले सरकार र अध्यक्ष प्रचण्डले पार्टी हाँक्ने निर्णय गरेको थियो ।
‘बुधबार बिहान ९ बजेका लागि सचिवालय बैठक बोलाइएको छ, नियमित बैठककै रूपमा बोलाइएको बैठकमा समसामयिक विषयमा छलफल हुन्छ,’महासचिव बिष्णु पौडेलले जनताटाइम्ससँग भन्नुभयो । दुवै अध्यक्षको वरीयता यथावत् रहने, सरकार र पार्टी काम अध्यक्षद्वय ओली–प्रचण्डबीच आपसी सहमतिमा गर्ने, बैठकको अध्यक्षता दुवै अध्यक्षले संयुक्त रूपमा गर्ने, तर आमरूपमा बैठकको अध्यक्षता र सञ्चालन प्रचण्डले गर्ने गरी गत मंसिर ४ मा नेकपाले अध्यक्षद्वय ओली–प्रचण्डको कार्य विभाजन गरेको थियो ।
अस्पतालमै अध्यक्ष ओलीसँग परामर्श गर्नुभएका प्रचण्डले बैठक बोलाउनु अघि वरिष्ठ नेता झलनाथ खनाल, माधवकुमार नेपाल, वामदेव गौतम, नारायणकाजी श्रेष्ठ, ईश्वर पोखरेल र महासचिव विष्णु पौडेलसँग छलफल गरेर बैठक बोलाउनु भएको हो । अध्यक्ष प्रचण्डले मंगलबार बिहान वरिष्ठ नेता नेपाल र प्रवक्ता श्रेष्ठ र दिउँसो उपप्रधान तथा रक्षामन्त्री ईश्वर पोखरेलसँग बैठकबारेछलफल गर्नुभएको थियो । आज बहिान ९ बजेपार्टीकार्यालय धुम्बाराहीमा बस्ने बैठकमा प्रधानमन्त्री ओली उपचारको शिलशिलामा अस्पतालमै रहेकाले सहभागी हुनुहुने छैन ।
बैठकमा प्रधानमन्त्रीको स्वास्थ्यलाभको कामना, उपनिर्वाचनको समीक्षा, स्थायी कमिटी, केन्द्रिय कमिटीको बैठक र नेता कार्यकर्तालाई सक्रिय बनाउने गरी सातै प्रदेशमा अभियान सञ्चालन लगाएतका एजेण्डामा छलफल हुने भएको छ। प्रधानमन्त्रीको स्वास्थ्य अवस्था र पार्टी सञ्चालनको जिम्मेवारीलाई मध्यनजर गर्दै अध्यक्ष दाहालले मंसिर २४ गतेलाई तय भएको आफ्नो चीन भ्रमणसमेत स्थगित गर्नुभएको छ ।
यसअघि प्रधानमन्त्री ओली उपचारका लागि सिंगापुरमा रहेका बेला अर्थात भदौ ९ गते पनि दाहालको अध्यक्षतामा सचिवालय बैठक बसेको थियो। पार्टी कार्यालयमा बसेको उक्त बैठकले सांगठनिक एकीकरणका केही काम टुङ्गाएको थियो भने नेताकार्यकर्तालाई लागू हुने गरेर अनुशासनका सम्बन्धमा महत्वपूर्ण निर्णय गरेको थियो।
प्रतिक्रिया दिनुहोस्