काठमाडौं, माघ २४। नेकपा एमालेका अध्यक्ष केपी शर्मा ओलीका पत्नी समाजसेवी राधिका शाक्यले काठमाडौं महानगरपालिकाबाट पूर्वमेयर बालेन साहले आफ्नो पवित्र कोखमाथि गम्भीर प्रश्न उठाएको भन्दै कडा आक्रोश पोख्नुभएको छ ।

आफूराजनीतिमा संलग्न नभएपनि बालेनले भदौ २३ र २४ गतेको घटनालाई लिएर सामाजिक सञ्जालमा ब्यक्त गरेको बिचारले आफ्नो कोखकै अपमान गरेको शाक्यले बताउनु भएको हो । अनलाइन खवरमा लामो लेखमार्फत शाक्यले त्यस दिनको बिषयमा सबिस्तार चर्चा गर्दै बालेन साहले प्रधानमन्त्रीको बिरुद्ध लेखेको भनेपनि सो कुरा राजनीतिक नभएर आफ्नो कोखमाथि निकृष्ट शैलीमा प्रश्न उठाएको बताउनु भएको छ ।

भदौ २३ मा १९ जनाको ज्यान गएको घटनाले आफू निकै दुःखी बनेको बेला आफूलाई नयाँ र युवाको मसिहा ठानेर बालेनले राजनीतिक स्वार्थका लागि आफूमाथि मानवीय आक्रमण गरेको शाक्यले लेखमार्फत खुलाउनु भएको छ । शाक्यले भदौ २३ को घटनाको बिषयमा आफूले बालुवाटारमा देखेको कुरा उल्लेख गर्ने क्रममा भन्नुभएको छ, ‘ त्यो खासमा प्रधानमन्त्री विरुद्धको कुनै राजनीतिक स्टेटमेन्ट थिएन, त्यो मेरो पवित्र कोखमाथि उठाइएको गम्भीर प्रश्न थियो ।’

यस्तो छ शाक्यको भनाई

त्यही रात, आफू नयाँ युगको मसिहा र आफूलाई सर्वज्ञाता ठान्ने एक जना जनप्रतिनिधिले सामाजिक सञ्जालमा प्रधानमन्त्रीलाई लक्षित गर्दै एउटा उत्तेजक स्टाटस लेखेका थिए, ‘साँच्चै नै बा हुन पाएको भए पो छोराछोरीको मृत्युको पीडा बुझ्थिस् ।’ अपमानजनक र दुर्वाच्य वाक्यशैली प्रयोग गरेर उनले नियतवस् प्रहार गरेको त्यो वाक्य शब्दहरूको समूह मात्र थिएन । तत्कालको तरल परिस्थितिलाई थप उत्तेजक बनाउन र जनमानस भड्काउनका लागि प्रक्षेपण गरिएको शब्दबम थियो त्यो-जुन सामाजिक सञ्जालद्वारा बर्साइएको थियो ।

सन्तानप्रतिको मायाममता महसुसै नहुने गरी हाम्रा मनमा कुनै अहंकारको अङ्कुरण कहिल्यै भएको छैन र हाम्रो विवेकमा न बादल लागेको छ न बुद्धिमा बिर्को । यो शब्दक्षेप्यास्त्र हाम्रा संवेदना, मानवता र करुणामाथिको सबैभन्दा चर्को आक्रमण थियो र सत्यविरुद्ध घिनलाग्दो सङ्गिन आरोप पनि । म झन् मर्माहत भएँ ।

उनले कलिला नानीबाबुहरूको रगतको आहालमा पौडी खेलेर कसैको सन्तान उत्पादनसँग सम्बन्धित जैविक क्षमतामाथि प्रहार गरेका थिए । त्यो खासमा प्रधानमन्त्री विरुद्धको कुनै राजनीतिक स्टेटमेन्ट थिएन, त्यो मेरो पवित्र कोखमाथि उठाइएको गम्भीर प्रश्न थियो ।

मेरो मात्र होइन, सन्तान हुन नसकेका आममहिलाका जननीत्वमाथिको प्रहार, उपहास र अपमान थियो । तिनको शब्दमा प्रधानमन्त्रीको पदउपरको डाह र आक्रोश थिएन त्यो त नारी आममातृत्वमाथिको बज्रप्रहार थियो । एक नारीमाथिको यस्तो प्रहारले हृदय कति छियाछिया बनाउँदो रहेछ त्यसदिन मैले अनुभुत गरेँ ।

हो, मेरो कोखबाट बच्चा जन्मिएका छैनन् तर छोराछोरीको माया, बालबालिकाप्रतिको स्नेह र मान्छेप्रतिको प्रेमको भण्डार हामीमा कति फराकिलो छ भन्ने कुरा धेरैलाई थाहा छ । सन्तानप्रतिको मायाममता महसुसै नहुने गरी हाम्रा मनमा कुनै अहंकारको अङ्कुरण कहिल्यै भएको छैन र हाम्रो विवेकमा न बादल लागेको छ न बुद्धिमा बिर्को । यो शब्दक्षेप्यास्त्र हाम्रा संवेदना, मानवता र करुणामाथिको सबैभन्दा चर्को आक्रमण थियो र सत्यविरुद्ध घिनलाग्दो सङ्गिन आरोप पनि । म झन् मर्माहत भएँ । त्यो रात न आँसु रोक्न सकेँ, न कुनै मेसो पाउन सकेँ ।