काठमाडौं, फागुन १६ । इजरायल र ‍अमेरिकाले संयुक्त रूपमा इरानका विभिन्न रणनीतिक स्थानहरूमाथि ‘प्रि-एम्प्टिभ’ (अग्रिम सुरक्षात्मक) हवाई आक्रमण सुरु गरेका छन् । दुई देश मिलेर गरेको यो हवाई आक्रमण सन् २०२५ को जुन महिनामा भएको १२ दिने हवाई युद्धपछिको सबैभन्दा ठूलो र निर्णायक सैन्य कारबाही मानिएको छ।

इजरायली सेना (आइडीएफ) ले यस अभियानलाई ‘अपरेसन शिल्ड अफ जुडा’ नाम दिएको छ। यो कारबाही इरानको आणविक कार्यक्रम र ब्यालिस्टिक क्षेप्यास्त्र क्षमतालाई ध्वस्त पार्ने उद्देश्यले गरिएको इजरायली रक्षा मन्त्रालयले दाबी गरेको छ । अन्तर्राष्ट्रिय सन्चार माध्यमहरुले जनाएअनुसार इरानले पनि प्रतिरक्षात्मक आक्रमण सुरु गरेको छ । छन् ।

स्थानीय समय अनुसार शनिबार बिहानै तेहरानको आकाशमा शक्तिशाली विस्फोटका आवाजहरू सुनिएको थियो। इरानको सरकारी समाचार एजेन्सी ‘फार्स’ का अनुसार, तेहरानको जम्हुरी क्षेत्र र युनिभेर्सिटी स्ट्रीटहरूमा धेरै क्षेप्यास्त्रहरू खसेका छन्। विस्फोटको तीव्रता यति भयानक थियो कि तेहरानका उत्तरी र मध्य भागका घरहरू हल्लिएका थिए। सहरका धेरै भागहरूमा बाक्लो कालो धुवाँको मुस्लो देखिएको छ।

यो क्षेत्र इरानको राजनीतिक शक्तिको केन्द्र मानिन्छ, जहाँ सर्वोच्च नेता आयतोल्लाह अली खामेनीको कार्यालय समेत रहेको छ। तेहरानको मेहराबाद विमानस्थल नजिकै पनि आक्रमण भएको खबर छ, जसका कारण इरानले आफ्नो सम्पूर्ण हवाई क्षेत्र तत्कालका लागि बन्द गरेको छ।

इजरायलको आधिकारिक घोषणा र संकटकाल

आक्रमण सुरु भएलगत्तै इजरायली रक्षामन्त्री इजरायल काट्जले तेल अभिभबाट राष्ट्रका नाममा सम्बोधन गर्दै यो कदम इजरायलको सुरक्षाका लागि अनिवार्य रहेको बताउनु भएको छ । उहाँले भन्नुभयो, ‘इजरायलले इरानबाट आउन सक्ने तत्कालिन र अस्तित्ववादी खतरालाई निर्मूल पार्न यो ‘प्रि(एम्प्टिभ’ प्रहार गरेको हो। हामी हाम्रा नागरिकको रक्षाका लागि कुनै पनि हदसम्म जान तयार छौँ ।’

यससँगै इजरायलभर ‘राष्ट्रिय संकटकाल’ घोषणा गरिएको छ। नागरिकहरूलाई सुरक्षित बंकरमा रहन र विद्यालय तथा सार्वजनिक स्थलहरू बन्द गर्न निर्देशन दिइएको छ। इजरायली सेनाले सम्भावित इरानी जवाफी हमलाको सामना गर्न आफ्नो ‘आइरन डोम’ र नयाँ ‘आइरन बिम’ ९लेजर आधारित सुरक्षा प्रणाली० लाई उच्च सतर्कतामा राखेको थियो ।

अमेरिकाको प्रत्यक्ष संलग्नता

यस पटकको आक्रमणमा अमेरिकाको भूमिका केवल सहयोगीमा मात्र सीमित छैन। अमेरिकी रक्षा मन्त्रालय पेन्टागनका अनुसार, अमेरिकी वायुसेना र नौसेनाले यस अपरेसनमा सक्रिय सहभागिता जनाएका छन्। शुक्रबार ह्वाइट हाउस बाहिर सञ्चारकर्मीहरूसँग कुरा गर्दै राष्ट्रपति डोनाल्ड ट्रम्पले इरानमाथि सैन्य आक्रमण गर्ने विषयमा हालसम्म कुनै “अन्तिम निर्णय” नभए पनि वार्ताको वर्तमान अवस्थाप्रति आफू खुसी नभएको अभिव्यक्ति दिनुभएको थियो ।

राष्ट्रपति ट्रम्प प्रशासनले इरानलाई आफ्नो आणविक हतियार निर्माण प्रक्रिया रोक्न दिएको अन्तिम चेतावनीको समयसीमा सकिएलगत्तै यो आक्रमण सुरु भएको हो। अमेरिकी नौसेनाका दुई ठूला विमानवाहक जहाजहरू, यूएसएस जेराल्ड आर फोर्ड र यूएसएस अब्राहम लिंकन, पर्सियन खाडी नजिकै तैनाथ गरिएका छन्।

ती जहाजहरूबाट उडेका एफ–३५ र एफ–२२ जस्ता अत्याधुनिक लडाकु विमानहरूले इरानका सैन्य पूर्वाधारहरूमा बमबारी गरेका छन्। अमेरिकी अधिकारीहरूले यसलाई “सानो स्तरको हमला” नभएर इरानको सैन्य ढाँचालाई नै कमजोर बनाउने बृहत् योजना भएको बताएका छन् ।

इरानी सैन्य शक्ति ध्वस्त पार्ने ट्रम्पको उद्घोष

अमेरिकी राष्ट्रपति डोनाल्ड ट्रम्पले आफ्नो सामाजिक सञ्जाल प्लेटफर्म ट्रुथ सोसलमा आठ मिनेट लामो भिडियो पोस्ट गर्दै इरानमा भएको आक्रमणमा अमेरिका संलग्न रहेको कुरा पुष्टि गर्नुभएको छ । राष्ट्रपति ट्रम्पले इरानको आणविक सपना र क्षेप्यास्त्र उद्योगलाई पूर्ण रूपमा धुलोमा मिलाइदिने कडा चेतावनी दिनुभएको छ ।

उहाँले इरानी क्रान्तिकारी गार्डलाई हतियार बिसाउन वा निश्चित मृत्यु रोज्न भन्दै यो आक्रमण अमेरिकी सुरक्षाका लागि चालिएको अनिवार्य कदम भएको स्पष्ट पार्नुभयो । इरानी जनताको स्वतन्त्रताको घडी नजिकिएको उल्लेख गर्दै ट्रम्पले अब इरानले कहिल्यै आणविक हतियार पाउन नसक्ने धारणासमेत राख्नुभएको छ ।

अन्तराष्ट्रिय समाचार एजेन्सीहरूका अनुसार इजरायल र अमेरिकाले इरानका रणनीतिक स्थानहरूलाई मुख्य निशाना बनाएका छन । तेहरानका राष्ट्रपति भवन परिसर र गुप्तचर मन्त्रालयहरू यस आक्रमणका प्राथमिक निशाना केन्द्र भएका छन् । पर्चिन सैन्य कम्प्लेक्स जहाँ इरानले आफ्नो क्षेप्यास्त्र र विस्फोटक पदार्थको परीक्षण गर्ने गर्दछ, ती क्षेत्रहरूमा इजरायलले आक्रमण तीव्र बनाएको छ ।

त्यसैगरी इरानी आणविक ऊर्जा एजेन्सीका केही प्रशासनिक भवनहरू पनि आजको आक्रमणबाट विध्वंसित भएका छन् । इसफाहान, कोम, करज र केर्मानशाह जस्ता प्रमुख सहरहरूमा पनि विस्फोटका खबरहरू आएका छन्।

इरानको चेतावनी : ‘क्रसिङ‘ बदला

इरानी प्रशासनले यस आक्रमणलाई आफ्नो राष्ट्रिय अस्मितामाथिको गम्भीर चोट भन्दै प्रतिआक्रमणको चेतावनी दिएको छ । इरानी अधिकारीहरूले शनिबार तेहरानले इजरायल र अमेरिकाको संयुक्त आक्रमणको बदला लिन तयारी गरिरहेको बताएका हुन । तेहरान अहिले प्रतिशोधात्मक कारबाहीका लागि जुटिरहेको र यसको जवाफ निकै कडा हुने कुरा ती अधिकारीहरूले स्पष्ट पारेका छन्।

इरानी रक्षा अधिकारीहरूले रोयटर्ससँग कुरा गर्दै भनेका छन, ‘तेहरान यसको बदला लिन पूर्ण रूपमा तयार छ र हाम्रो जवाफ ‘विनाशकारी’ ९क्रसिंग० हुनेछ ।’ इरानले आफ्ना सबै क्षेप्यास्त्र युनिटहरूलाई तयारी अवस्थामा राखेको छ र इजरायलका प्रमुख सहरहरूलाई निशाना बनाउने चेतावनी दिएको छ।

इरानी संसदको राष्ट्रिय सुरक्षा आयोगका प्रमुख इब्राहिम अजिजीले सामाजिक सञ्जालमार्फत इजरायल र अमेरिकालाई कडा चेतावनी दिएका छन् । ‘हामीले तपाईँहरूलाई पहिले नै चेतावनी दिएका थियौँ,’ उहाँले भन्नुभएको छ ।

रिपोर्टहरूका अनुसार, इरानका सर्वोच्च नेता आयतोल्लाह खामेनीलाई सुरक्षाका कारण गोप्य र सुरक्षित स्थानमा सारिएको छ। इरानभित्र इन्टरनेट र मोबाइल फोन सेवाहरू ठप्प पारिएका छन्, जसले गर्दा जनमानसमा अन्योल र त्रास झन् बढेको छ।

बीबीसीका नयाँ रिपोर्ट अनुसार आईडीएफले इरानले इजरायल विरुद्ध प्रतिशोधात्मक आक्रमण सुरु गरेको जानकारी दिएको छ। केही समयअघि इरानबाट इजरायलतर्फ मिसाइलहरू प्रहार गरिएको पहिचान भएपछि देशभरका विभिन्न क्षेत्रमा खतराको जनाउ दिने साइरनहरू बजाइएको थियो।

आईडीएफले सर्वसाधारणलाई होम फ्रन्ट कमान्डका निर्देशनहरू पालना गर्न अनुरोध गरेको छ । यस समयमा इजरायली वायुसेनाले खतराहरूलाई रोक्न र आवश्यक परेको ठाउँमा आक्रमण गरी जोखिम हटाउन अपरेसन सञ्चालन गरिरहेको छ ।

रक्षा प्रणाली पूर्णरूपमा अभेद्य नहुने हुनाले जनताले होम फ्रन्ट कमान्डको मार्गदर्शनलाई निरन्तर पछ्याउनु अनिवार्य रहेको कुरामा विज्ञप्तिले जोड दिएको छ । आईडीएफले सार्वजनिक सुरक्षाका लागि तोकिएका नियमहरू पालना गर्न बारम्बार आग्रह गरिरहेको छ ।

खाडी मुलुकले गरे हवाई सेवा बन्द

इजरायल र अमेरिकाले संयुक्त रुपमा इरानमाथि आक्रमण सुरू गरेपछि खाडी मुलुकहरूले हवाई क्षेत्र बन्द गरेका छन् । इरानमाथि आक्रमण सुरू भएपछि कतार, कुवेत र युएईले आफ्नो हवाई क्षेत्र बन्द गरेको अल जजिराले जनाएको छ । शनिबार इजरायल र अमेरिकाले संयुक्त रुपमा इरानका विभिन्न सहरहरूमा हवाई आक्रमण गरेका छन् । इरानले पनि प्रतिआक्रमण सुरू गरेको छ ।