काठमाडौं, बैशाख १६ । बालेन्द्र साह नेतृत्वको रास्वपा सरकारले सार्वजनिक यातायातको भाडा फेरि वृद्धि गरेको छ । भौतिक पूर्वाधार तथा यातायात मन्त्री सुनिल लम्सालले मंगलवार मन्त्रीस्तरीय निर्णय गर्दै जनतालाई सेवा दिन सार्वजनिक यातायातमा ५ प्रतिशत भाडा वृद्धि गर्नुभएको हो ।

मन्त्रीस्तरीय निर्णयसँगै कार्यान्वयनमा आएको यातायात व्यवस्था विभागका निर्देशक मणि भुसालले जानकारी दिनुभयो । ‘हिजो (मंगलवार) मन्त्रीज्यूको निर्देशनमा हामीले अन्तर प्रदेशस्तरीय भाडा ५ प्रतिशत वृद्धि गरेका छौँ ’ भुसालले भन्नुभयो । उहाँका अनुसार अव यात्रुवाहक र ढुवानीका दुवै सवारीमा ५ प्रतिशतले भाडा वृद्धि भएको छ ।

यसअघि भाडा समायोजन गर्दा डिजेलको औसत बजार मूल्य प्रतिलिटर १८० रुपैयाँ ८३ पैसा रहेकोमा हाल ५५ रुपैयाँले वृद्धि भई २३५ रुपैयाँ ८३ पैसा कायम भएको छ । यो भाडादर अघिल्लो मूल्यको तुलनामा ३०.४१ प्रतिशतको वृद्धि हो । इन्धनमा भएको यही मूल्यवृद्धिलाई आधार मानी भौतिक पूर्वाधार तथा यातायात मन्त्रालयको सैद्धान्तिक सहमतिमा नयाँ भाडादर लागू गरिएको विभागले जनाएको छ ।

यसअघि गत चैत २५ गते केन्द्र सरकारले सार्वजनिक यातायातमा भाडा समायोजन गरेको थियो । यातायात व्यवस्था विभागले १३ वटा सूचकलाई मध्यनजर गर्दै यात्रुवाहक सार्वजनिक यातायातको भाडा १६.७१ प्रतिशत, पहाडी क्षेत्रमा चल्ने मालवाहक सवारीको भाडा २१.६८ प्रतिशत र तराई क्षेत्रमा चल्ने मालवाहक सवारीको भाडा १५.७५ प्रतिशतले बढाइएको छ ।

त्यसयता २ पटक इन्धनको मूल्य वृद्धि भइ डिजेलमा ५५ रुपैयाँ बढी पुगेपछि यातायात व्यवसायीहरू भाडा पुनः समायोजन गर्न माग गर्दै आएका थिए । विभागले वैशाख ९ गते मन्त्रालयलाई यात्रुवाहक सवारीका लागि ९.८ प्रतिशत र ढुवानीका सवारीका लागि पहाडीमा करिब १४ प्रतिशत र तराईमा १२ प्रतिशतका दरले समायोजन गर्ने गरी सिफारिस गरेको थियो ।

सो सिफारिशपछि मन्त्री लम्सालले ५ प्रतिशतले वृद्धि गरी समायोजन गर्न स्वीकृति दिनुभएको हो । प्रधानमन्त्री बालेन साह नेतृत्वको सरकार बनेपछिको एक महिनामै यो दोस्रो पटक भाडा बढाइएको हो । सरकारले अन्तराष्ट्रिय कारण देखाएर पेट्रोलियम पदार्थको मूल्य बढाउने र त्यसको आधारमा सार्वजनिक यातायातमा भाडा बढाउने काम गर्दै आएको छ ।