रास्वपा सभापति रवि लामिछानेले महाधिवेशनमा प्रधानमन्त्री बालेन साह समूहले चुरीफुरी गर्न थालेको सूचना पाएपछि निर्वाचन आयोगमार्फत कडा आचार संहिता जारी गराएर लगाम लगाउनु भएको छ । राजकीय स्रोतबाट चुनाव प्रभावित पार्न नपाइने, र प्यानल बनाउन निषेध गर्दै आचारसंहिता जारी गरिएको हो ।

चितवन, असार ६ । सत्तारुढ दल राष्ट्रिय स्वतन्त्र पार्टी (रास्वपा) को प्रथम राष्ट्रिय महाधिवेशनमा कडा आचार संहिता बनाइएको छ ।

आइतबारबाट चितवनमा सुरु हुने महाधिवेशनमा सत्ताको दुरुपयोग हुने देखिएपछि सभापति रवि लामिछानेको निर्देशनमा निर्वाचन आयोगले कडा आचारसंहिता बनाएर लागू गरिएको हो । रास्वपाले प्रधानमन्त्री बालेन्द्र शाह निकट मानिएको नेताहरुले गुटबन्दी र सत्ताको दुरुपयोग बढाउने संकेत पाएपछि ठेगान लगाउन राजकीय सत्ताको उपयोग नै गर्न नपाइने नियम बनाएको छ ।

रास्वपाको महाधिवेशनका लागि चितवनमा देशभरका रास्वपा नेताकार्यकर्ता भेला भइसकेका छन् । पार्टी गठनको चार वर्षपछि पहिलो पटक हुन लागेको महाधिवेशनले नयाँ कार्यसमिति समेत चयन गर्नेछ । त्यसको व्यवस्थापकीय र वैधानिक पक्षको काम गर्न रास्वपाले केन्द्रीय निर्वाचन आयोगको व्यवस्था गरेको छ ।

आयोगले प्रथम महाधिवेशनका लागि राजकीय स्रोतबाट चुनाव प्रभावित पार्न नपाइने र प्यानल बनाउन निषेध गर्दै चार बुँदे निर्वाचन आचारसंहिता पनि जारी गरेको छ । आचारसंहिताअनुसार पहिलो बुँदामा उम्मेदवारी तथा प्रचार प्रसार सम्बन्धी व्यवस्था गरेको छ । जसमा विधिवत् उम्मेदवारी प्रमाणित भइसकेपछि मात्रै प्रचारप्रसार गर्न पाइने, प्यानल वा गुटबन्दी गर्न नपाइने, संयुक्त सूची बाँड्न नपाइने जस्ता विषय उल्लेख छ ।

यस्तै, दोस्रो बुँदामा पार्टी र सरकारको जिम्मेवारीमा रहेका व्यक्तिले राजकीय र दलीय स्रोतको प्रयोग गरेर निर्वाचनको निष्पक्षतामा प्रभाव पार्न नपाइने भनिएको छ । तेस्रो बुँदामा मतदान सम्बन्धी व्यवस्था र चौथो बुँदामा उजुरी तथा कारबाही सम्बन्धी व्यवस्था राखिएको छ ।