सिन्धुली, भदौ ११ । रसुवामा आएको भीषण बाढीपछि रोजगारी तथा विभिन्न कामका सिलसिलामा त्यहाँ पुगेका सिन्धुलीका ३६ जना नागरिक सम्पर्कविहीन भएका छन्। जिल्ला प्रशासन कार्यालय सिन्धुलीका अनुसार रसुवाका विभिन्न जलविद्युत् आयोजना, सडक निर्माण, होटल तथा अन्य क्षेत्रमा कार्यरत उनीहरू बाढीपछि परिवार तथा आफन्तको सम्पर्कमा आउन सकेका छैनन्।

सम्पर्कविहीन हुनेमा कमलामाई नगरपालिका, फिक्कल गाउँपालिका, तीनपाटन गाउँपालिका, सुनकोशी गाउँपालिका, हरिहरपुरगढी गाउँपालिका र दुधौली नगरपालिकाका बासिन्दा रहेका छन्।

जिल्ला प्रशासन कार्यालयले उनीहरूको खोजी तथा उद्धारका लागि रसुवास्थित स्थानीय प्रशासन र सुरक्षा निकायसँग निरन्तर समन्वय भइरहेको जनाएको छ। बाढीपछि आफन्तसँग सम्पर्क हुन नसकेपछि परिवारजनले प्रहरी तथा स्थानीय प्रशासनलाई जानकारी गराएका थिए।

बाढी प्रभावित क्षेत्रमा टेलिफोन तथा सञ्चार सेवा अवरुद्ध रहेकाले पनि कतिपय व्यक्ति तत्काल सम्पर्कमा आउन नसकेको हुनसक्ने प्रशासनको अनुमान छ। प्रशासनले आफन्तहरूलाई धैर्य धारण गर्न तथा कुनै सूचना प्राप्त भएमा तत्काल जिल्ला प्रशासन कार्यालय वा नजिकको प्रहरी कार्यालयमा जानकारी गराउन आग्रह गरेको छ।

प्रशासनले सार्वजनिक गरेको प्रारम्भिक विवरणअनुसार सम्पर्कविहीन भनिएका ३६ जनाको नाम, स्थायी ठेगाना र रसुवामा कार्यरत स्थान यसप्रकार छन्।

प्रशासनले सूची प्रारम्भिक विवरणमा आधारित रहेको जनाउँदै खोजी तथा उद्धार कार्य अघि बढिरहेकाले थप सूचना प्राप्त हुनसक्ने जनाएको छ। सम्पर्कविहीन व्यक्तिबारे जानकारी प्राप्त हुनेबित्तिकै सम्बन्धित निकायमा जानकारी गराउन पनि आग्रह गरिएको छ।