काठमाडौं, भदौ १६। रसुवाको बाढीपछि बेपत्ता भएकाको खोजी तथा उद्धारका लागि मंगलबार संयुक्त टोली चारवटा टनेलमा प्रवेश गरे पनि कसैको उद्धार हुन सकेन ।

नेपाली सेनाका अनुसार मंगलबार हवाई तथा जमिनी खोजी अभियानबाट एक विदेशी नागरिकसहित ११८ जनाको उद्धार गरिएको छ । तर टनेलभित्र भने बेपत्ता व्यक्तिको अवस्था पत्ता लगाउन टोली सफल हुन सकेन ।

चिलिमे हाइड्रोपावरको टनेलमा विदेशीसहित २६ जनाको संयुक्त खोज तथा उद्धार टोली प्रवेश गरेको थियो । टोली करिब १५० मिटरभित्र पुग्दा भिरालो भागदेखि टनेल पूर्णरूपमा पुरिएको अवस्थामा भेटिएको सेनाले जनाएको छ ।

त्यस्तै, अपर त्रिशूली–१ आयोजनाको हाँकूस्थित टनेलमा विदेशीसहितको संयुक्त टोली करिब १६० मिटरभित्र पुगेको थियो । तर टनेल टालिएको अवस्थामा भेटिएपछि थप अघि बढ्न नसकेको सेनाले जनाएको छ ।

त्रिशूली–३ ‘बी’ आयोजनाको टनेल हेडसमेत पहिचान गरिएको छ । तीनवटा स्काभेटर प्रयोग गरी माटो पन्छाएर कम्प्रेसर तथा रक ब्रेकरमार्फत इनलेट टनेलमा प्वाल पारिएको थियो । तर प्वालबाट अत्यधिक पानी आएको र उक्त स्थानबाट भित्र प्रवेश गर्न असम्भव देखिएपछि आउटलेटतर्फबाट पुनः प्वाल पार्ने काम भइरहेको सेनाले जनाएको छ ।

यसैगरी, त्रिशूली–३ ‘बी’ आयोजनाको कार्यालय तथा कर्मचारी निवासको स्थान पहिचान गरी एक्साभेटरमार्फत पहुँचमार्ग निर्माणको काम जारी रहेको छ ।

नुवाकोटमा २५० मिटर लामो तुइन जडान

बाढीबाट प्रभावित क्षेत्रमा आवागमन सहज बनाउन नेपाली सेनाको संयुक्त टोलीले तुइन निर्माणको कामसमेत अघि बढाएको छ ।

त्रिशूली नदीका प्रभावित पाँच स्थानमा तुइन निर्माण गर्ने योजनाअन्तर्गत नुवाकोटको विदुर–९ स्थित इन्द्रायणी घाटमा करिब २५० मिटर लामो तुइन जडान गरिएको सेनाले जनाएको छ ।

तुइन जडान भएपछि सम्पर्कविहीन तथा सडक पहुँचबाट प्रभावित क्षेत्रका नागरिकलाई बजार र अस्पतालसम्म पुग्न सहज भएको सेनाले जनाएको छ ।