काठमाडौं, कात्तिक ३ । दुई छुट्टाछुट्टै अनुसन्धानले ‘ओ’ रक्त समूहका व्यक्ति कोरोना भाइरस (कोभिड–१९) बाट संक्रमित हुने सम्भावना अपेक्षाकृत कम भएको देखाएको छ । संक्रमित भएको अवस्थामा समेत उक्त रक्त समूहका व्यक्तिमा जटिल समस्या उत्पन्न नहुने अनुसन्धानबाट प्राप्त निचोडले देखाएको छ ।

केही दिन अघि प्रकाशित उक्त अनुसन्धानको नतिजाले विज्ञहरुले यसबारेमा थप अध्ययनको आवश्यकता औंल्याएका छन् । अनुसन्धानकर्ताले रगत समूहले सङ्क्रमण फैलन अतिसंवेदनशील भूमिका निर्वाह गर्न सक्ने र संक्रमितको स्वास्थ्य अवस्था जटिल हुनमा रगत समूहले समेत निर्धारण गर्ने तथ्य औल्याएका छन । कोभिड–१९ को सङ्क्रमण र रगत समूहको सम्बन्धबारे अनुसन्धानले स्पष्ट गरेको छैन । यद्दपी यसबारे थप अध्ययनको लागि सुझाइएको छ ।

सीएनएनका अनुसार डेनमार्कमा गरिएको अनुसन्धानमा सात हजार ४ सय २२ जना कोरोना संक्रमितको स्वास्थ्य अवस्थाबारे अध्ययन गरिएको थियो । जस्मा ३८.४ प्रतिशत ‘ओ’ रगत समूहका संक्रमित फेला परे । संक्रतिम नभएका करिब २२ लाख जनसंख्यामध्ये ‘ओ’ रगत समूहका ४१.७ प्रतिशत थिए । ‘ए’ रगत समूहका करिब ४४.४ प्रतिशत सङ्क्रमित थिए । डेनमार्कको कुल जनसंख्याको करिब ४२.४ प्रतिशत ‘ए’ रगत समूहका छन् । त्यसैगरी, क्यानाडामा गम्भिर रुपमा बिरामी भएका ९५ जना सङ्क्रमितमा गरिएको अनुसन्धानमा ८४ प्रतिशत ‘ए’ र ‘एबी’ रगत समूहका थिए ।

दुबै रगत समूहका ब्यक्तिमा ‘ओ’ र ‘बी’ रगत समूहका भन्दा बढी मात्रामा भेन्टिलेशन उपचारको आवश्यकता देखियो । क्यानाडामा गरिएको अध्ययनले ‘ए’ र ‘एबी’ रगत समूहका व्यक्तिलाई ‘ओ’ र ‘बी’को अपेक्षा बढी समय सघन उपचार कक्षमा बस्नुपर्यो । औसतमा ‘ए’ र ‘एबी’ रगत समूहका व्यक्ति १३.५ दिन आईसीयूमा बिताउनुभयो । ‘बी’ र ‘ओ’ रगत समूहका व्यक्ति नौ दिन आईसीयूमा बस्दा निको भएको देखिएको छ । यूनिभर्सिटि अफ ब्रिटिश कोलम्बियामा मेडिसिन विभागका प्राध्यापक मिपिन्दर सेखोनले भन्नुभएको छ, ‘थप अध्ययन नभएसम्म ए रगत समूहकाले थुप्रै चिन्ता गर्नुपर्ने र बी वा ओ रगत समूहकाले आफू स्वतन्त्र रहेको ठान्नु हुन्न ।’ सेखोन क्यानाडामा गरिएको अनुसन्धानमा संलग्न हुनुहुन्थ्यो ।

अधिकांश मानवको रगत समूह चारमध्येको एक हुन्छ । ‘ए’, ‘बी’, ‘एबी’ वा ‘ओ’ चार रगत समूह हुन । अमेरिकामा अधिकांश व्यक्ति ‘ओ’ वा ‘ए’ रगत समूहका छन् । अनुसन्धानमा संलग्न नरहेका अमेरिकास्थित जोन हप्कीन्स विश्वविद्यालयका एकजना विद्वान डा. अमेश अदैजाले व्यक्तिको रगत समूहले कोभिड–१९ संक्रमणको अतिसंवेदनशीलता निर्धारणमा भूमिका खेल्न सक्ने बताउनुहुन्छ । गत् जुन महिनामा द् न्यु इंग्ल्याण्ड जर्नल अफ मेडिसिनमा प्रकाशित अनुवांशिक अध्ययन शोधमा ‘ए’ रगत समूहका व्यक्तिमा कोरोना सङ्क्रमणको जोखिम उच्च रहेको र ‘ओ’ रगत समूहका व्यक्तिमा जोखिम कम रहेको उल्लेख गरिएको थियो ।