काठमाडौं, पुष १३

सत्तारुढ नेकपामा देखिएको गुटले राजनीति हलचल भईरहेका बेला राष्ट्रियसभाको नेकपाका संसदीय दलको नेता दिनानाथ शर्माले आफू कुनै गुटमा सहभागी नहुने घोषणा गर्नुभएको छ ।
विगतमा प्रचण्ड–नेपाल पक्षको भेलामा उभिनु भएका उहाले अब पार्टी विभाजन रोक्न वामदेव गौतमसँग सहकार्यमा रहेको भन्दै केपी ओली र प्रचण्ड–माधव नेपाल दुवै खेमामा नलागेको बताउनु भएको हो ।

१७ पुषबाट बस्न लागेको राष्ट्रियसभाको बैठकमा पनि आफु तटस्थ भएर काम गर्ने बताउनु भयो । उहाले आफू स्वतन्त्र भूमिकामा रहने र राष्ट्रियसभामा दलको नेताको हैसियतले पार्टी मिलाउन लाग्ने बताउनु भयो । ‘म स्वतन्त्र भूमिकामा रहने भएको छु । पार्टी मिलाउन वामदेव गौतमसँग पनि छलफल गर्दैछु । हामी दुवैजनना एउटै कित्तामा भयौं अहिले । उसैपनि राष्ट्रियसभाले सरकार बनाउने र ढाल्ने होइन,त्यहाँ पक्ष विपक्षमा उभिनु पनि हुँदैन । मलाई कुनै पनि गुटमा सामेल नगर्नुस्’, उहाको भनाई थियो ।

५९ सदस्यीय राष्ट्रियसभामा राष्ट्रपतिबाट मनोनित तीन जना समेत जोडेर नेकपाका ५० सांसद छन् । ५० जना मध्ये वामदेव गौतम दुवैतिर नलाग्ने भनेर बस्नु भएको छ । प्रचण्ड–नेपाल पक्षले आफुहरुसँग २४ सांसद रहेको दावी गर्दै आएका छन् ।