१८ फाल्गुन २०७७, मंगलबार ००:००

नेकपाको टुंगो नलागेसम्म कांग्रेसले सरकारको विषयमा निर्णय गर्नु अर्थहिन


चितवन, फागुन १८

नेपाली कांग्रेसका नेता डा. शेखर कोइरालाले नेकपाको विवाद टुंगो नलागेसम्म कांग्रेसले सरकारको विषयमा निर्णय गर्नु अर्थहिन भएको बताउनु भएको छ । भरतपुर विमानस्थलमा मंगलबार पत्रकारसँग कुरा गर्दै उहाले प्रचण्ड–नेपाल र ओली समूह अलग्गिएको भनिए पनि आधिकारिक रूपमा नछुट्टिएकोले अहिले सरकारमा जाने–नजाने विषयको अर्थ नभएको बताउनु भएको हो ।


‘अहिलेसम्म कम्युनिस्ट एउटै छ, उनीहरुकै बहुमत छ’, उहाले भन्नुभयो, ‘एउटै नेकपा छ, कुन नेकपासँग मिलेर जाने ?’ निर्वाचन आयोगले दलको टुंगो नलगाई सरकारमा जाने प्रक्रिया अघि नबढ्ने उहाले स्पष्ट पार्नुभयो । अविश्वासको प्रस्तावका विषयमा कांग्रेसलाई केही थाहा नभएको बताउदै अहिले आफुहरु महाधिवेशनमा केन्द्रित रहेको जानकारी दिनुभयो ।