जनता टाइम्स

२२ फाल्गुन २०७७, शनिबार १४:५६

प्रचण्ड-माधव समुहको नियन्त्रणमा पाँच सांसद : घर जानै नदिएर होटलमा राखियो, पाँच करोडको अफर


काठमाडौं, फागुन २२ । सत्तारुढ नेकपाका अध्यक्ष तथा प्रधानमन्त्री केपी शर्मा ओलीलाई ‘कू’ गर्न नसकेपछि पार्टी बिभाजन गरी बाहिरिनु भएका अध्यक्ष पुष्पकमल दाहाल, प्रचण्ड र बरिष्ठ नेता माधवकुमार नेपाल सांसद खरिद बिक्रितिर लाग्नुभएको तथ्य बाहिर आएको छ । सर्वाेच्च अदालतले प्रतिनिधिसभा पुनःस्थापना गरी संसद बैठक सुरु हुने दिन आएपछि प्रचण्ड–माधव समुहले नेकपाका सांसदलाई करोडौं अफर दिएर केही दिनदेखि बडिगार्डसहित होटलमा राखेको तथ्य खुलेको हो ।

स्रोतका अनुसार आफूहरुतिर नरहने निश्चित भएपछि प्रचण्ड–माधव समुहका सांसद झपट रावल नेतृत्वको टीमलाई जिम्मा दिएर प्रतिनिधिसभाका पाँच सांसदलाई होटलमा राखिएको हो । सो समुहले आफ्नो संसदीय दलमा जवर्जस्ती गरेर पुर्याइएका पाँच जना सांसदलाई शुक्रवार साँझसम्म बबरमहलस्थित एक होटलमा राखेको स्रोतको भनाई छ । सो होटलमा प्रतिनिधिसभाका सांसद माया ज्ञवाली न्यौपाने, गंगा सत्गौवा चौधरी, चाँद तारा, लक्ष्मी चौधरी र सविना हुसेनलाई शुक्रवार साँझसम्म राखिएको र पाँचै जना सांसदको निगरानी युवा नेतासमेत रहनुभएका झपट रावलले गर्नुभएको स्रोतको भनाई छ ।

सिंहदरवारबाट नजिकै र जिल्ला प्रशासन कार्यालय काठमाडौंसँगै जोडिएको होटलमा सांसदलाई राखेर खरिद बिक्रिको काम भएको सूचना बाहिर आएपछि शुक्रवार सो होटलबाट ललितपुरतिर सारिएको स्रोतले जनताटाइम्सलाई बतायो । ‘पाँच जना सांसदलाई होटलबाट झपट रावलले लैजानु भएको देखियो, उहाँहरुलाई रावलले नै सार्ने काम गर्नुभएको छ,’ सोही समुहका एक नेताले भने । उनका अनुसार प्रत्येक सांसदलाई पाँच करोडको प्रलोभन दिएर प्रचण्ड–माधव समुहले आफ्नो नियन्त्रण र निगरानीमा राखेको छ ।

सांसदलाई आफ्नो सुरक्षामा राख्ने जिम्मेवारी पाउनु भएका प्रचण्ड–माधव समुहका नेता तथा सांसद झपट रावलले यस बिषयमा आफूलाई जानकारी नभएको बताउनु भयो । तपाईंको जिम्मामा रहनुभएका नेकपाका पाँच सांसद अहिले कहाँ हुनुहुन्छ ? भन्ने जनताटाइम्सको जिज्ञासामा सांसद रावलले हाँस्दै ‘सवै माननीयहरु घरमै हुनुहुन्छ’ भन्ने जवाफ दिनुभयो । हामीले घरमै पुगेर बुझ्दा पाँचै जना सांसदहरु दुई दिनदेखि घरमा त जानुभएकै छैन नि भन्ने थप प्रश्न गरेपछि रावलले हाँस्दै ‘दिउसो त कता घरमा हुुन्छन र हो मित्र ?’ भन्दै फोन राख्नुभयो । यो तथ्यले प्रचण्ड–माधव समुहले पाँच सांसद प्रचण्ड–माधव समुहले आफ्नो नियन्त्रणमा राखेको प्रष्ट भएको छ ।