Untitled Document

भियतनामको स्वर्गीय लोकेसनमा खिचिएको चलचित्र ‘लभ स्टेशन’ को गीत सार्वजनिक (भिडियो)

काठमाडौं, माघ ३

चलचित्र लभ स्टेशनको पहिलो पटक भियतनाममा छायाँकन गरिएको गीत ‘घाम जुन चाहिँदैन‘ को भिडियो दर्शकमाझ ल्याईएको छ ।

लिली बिली चलचित्रका जोडी चर्चित अभिनेता प्रदीप खड्का र अभिनेत्री जसिता गुरुङको प्रेम सम्बन्ध देखाईएको छ ।

त्यसैले यस पटकको प्रणय दिवस (भ्यालेन्टाईन डे) मा प्रदीप र जसिताले आफ्ना प्रिय दर्शकलाई प्रेमिल गीत ‘घाम जुन‘ उपहार दिएको बताएका छन् ।

आगामी २२ चैतबाट सिनेमा हलमा रिलिज हुने यो लभ स्टेशनको ‘घाम जुन चाहिँदैन‘ को भिडियो बुढाशुब्बा डिजिटलको युट्युव च्यानलबाट सार्वजनिक गरिएको छ ।

दीपक शर्माको शब्द संगीत रहेको यो गीतमा सुगम पोखरेल र रेश्मा पुन मगरको स्वर रहेको छ । यो गीतमा घाम जुन चाहिँदैन माया भए पुग्छ‘ भन्दै अभिनेता प्रदीप र अभिनेत्री जसिताले आ–आफ्नो प्रेमभाव प्रस्तुत गरेका छन् ।

छायाँकनको हिसावले गीतको भिडियो निकै सुन्दर बनेको छ । छायाँकनका लागि भियतनामको विश्वभर चर्चित लोकेशन दानाङ्ग, बाना हिल, ड्राईगन ब्रिज, हालम्बे, हानोई र इन्डोनेशियाको बालीमा यो गीतको छायाँकन गरिएको हो ।

यो लेकेशनमा दर्जनौं हलिउड मूभिहरु छायाँकन भईसकेको प्रस्तुतकर्ता गोविन्द शाहीले जानकारी गराए । गीतको माग अनुसार नै यो सुन्दर ठाउँमा छायाँकन गरिएको पनि शाहीले जानकारी गराए ।

यसै बिषयमा अभिनेता प्रदीप खड्काले यो लभ सङ भएकाले भ्यालेन्टाईन डे अर्थात प्रणय दिवसको अबसर पारेर नै दर्शकमाझ ल्याएको जानकारी गराए ।

चलचित्र रिलिजको लागि अब ५१ दिन बाँकी भएकाले पनि प्रचारको क्रम यही गीतबाट सुरुवात गरिएको प्रदिपले सुनाए ।

यस चलचित्र पारिवारिकसँगै प्रेम कथासँगै ‘लस्ट एन्ड फाउन्ड’ स्टोरीमा आधारित रहेको पनि जानकारी गराए ।

अग्रज निर्देशक उज्ज्जल घिमिरेले बनाएको यो चलचित्र परिपक्क बनेको पनि उनले बताए ।

‘लिली बिलीबाट दर्शकले साह्रै माया गर्नुभएको जसिता र मेरो जोडीलाई एक पटक पुनः उहाँहरुले लभ स्टेशनबाट त्यो भन्दा सार्थक रुपमा पर्दामा देख्न पाउनुहुनेछ ।’

यस चलचित्रलाई उज्ज्वल घिमिरेले निर्देशन गरेका हुन् भने प्रदीप र जसितासँगै रमेश बुढाथोकी, प्रकाश शाह, रेशु भट्टराई, बिनोद कुमार पौड्याल, प्रिया रिजाल, सरु बिष्ट, रवी डंगोल, दिनेश काफ्ले, कालु रानासहितको अभिनय छ ।

लभ स्टेशनलाई काफिया फिल्मस्को व्यानरमा काफिया शाही (क्रिसु) र कविरबिक्रम शाहीले निर्माण गरेका हुन् । यो चलचित्रको निर्माण नियन्त्रकमा राजेन्द्र रावल छन् ।

आलोक शुक्लाको छायाँकन रहेको लभ स्टेशनमा शम्भुजीत बाँस्कोटा, दीपक शर्मा, राजनराज शिवाकोटी र एलिश कार्कीको संगीत छ ।

February 15, 2019मा प्रकाशित

Leave a Reply

Your email address will not be published. Required fields are marked *