Untitled Document

अन्तर्राष्ट्रिय वैदिक एवं आधुनिक विज्ञान महासम्मेलनको निश्कर्ष : पाँच वर्षभित्र वैदिक राष्ट्रको आधार तय

काठमाडौं, फागुन १९

तीनदेखि चलेको अन्तर्राष्ट्रिय वैदिक एवं आधुनिक विज्ञान महासम्मेलनले ध्यान, योगका माध्यमबाट देशमा सात्विक शक्तिको विस्तार गरी पाँच वर्षभित्र वैदिक राष्ट्रको आधार तय गर्ने निष्कर्ष निकालेको छ ।

नेपाल महर्षि वैदिक फाउण्डेशन, नेपाल महर्षि फाउण्डेशन फर वैदिक कल्चर र महर्षि फाउन्डेसन फर वैदिक इण्डियाको संयुक्त आयोजनामा भएको तीनदिने महासम्मेलनले सात्विक गुण बढाउन नेपालको जनसङ्ख्याको एक प्रतिशतलाई नियमित ध्यान गराउने वातावरण बनाउने गरी देशभर वैदिक ज्ञानका रुपमा ध्यानसहित सिद्धि कार्यक्रम फैल्याउने घोषणा गरेको छ । महासम्मेलन समापनमा मन्त्रिपरिषद्का पूर्वअध्यक्ष खिलराज रेग्मीले नेपालमा वैदिक र आधुनिक विज्ञानको अध्ययन अनुसन्धान केन्द्र स्थापना गरिनुपर्ने बताउनुभयो ।

“मानिसभित्रको विकार फाल्नलाई दैनिक ध्यान, यो साधना गर्ने वैदिक परम्परालाई पुनःस्थापना गर्न सके धेरै समस्याको समाधान हुन्छ, हालै नेपालीमा अनुवाद भएको स्कन्द पुराणको मानसखण्डमा मानसरोवरबाट तलको नेपाली भागमा धेरै पीठ एवम् धाम रहेको तथ्य सार्वजनिक भएको छ, त्यसको प्रचारप्रसार गरी नेपालमा वैदिक पर्यटन प्रवद्र्धन गर्न सकिन्छ”, उहाँले भन्नुभयो ।

कार्यक्रममा फाउण्डेशनका अध्यक्ष दीपकप्रकाश बाँस्कोटाले पाँच वर्षभित्रमा देशको ५० प्रतिशत भूभागमा विषादीरहित जैविक एवं वैदिक कृषि प्रणालीको पुनःस्थापना गर्ने लक्ष्य लिइएको बताउनुभयो । “नैतिक शिक्षाका लागि गुरुकुल पद्धतिको सुधारिएको रुप प्रस्तुत गर्ने, वास्तुसम्मत घर एवम् विद्यालय निर्माणका लागि जागरण अभियान शुरु गरी सबै क्षेत्रमा वैदिक सभ्यता पुनःस्थापनाको थालनी गरिनेछ”, उहाँले भन्नुभयो ।

अमेरिकाको आहायोमा रहेको महर्षि वैदिक व्यवस्थापन विश्वविद्यालयका कुलपति डा जोन हेग्लिनले वैदिक शिक्षण पद्धति अमेरिकामा लोकप्रिय बनेको अनुभव सुनाउनुभयो । धेरै नेपाली र भारतीय भूमिका विद्यार्थी पनि हाल वैदिक ज्ञान लिन त्यहाँ जाने गरेका उहाँले बताउनुभयो ।

नेपाल प्रज्ञा प्रतिष्ठानका उपकुलपति डा जगमान गुरुङले पश्चिमा मुलुकमा विकास भएको विज्ञानको जननी नेपाली भूमिमा शुरु भएको वैदिक परम्परा भएको बताउनुभयो । नेपाल सन्त समाजका अध्यक्ष स्वामी ज्ञानानन्दले शिक्षामा सुधार नल्याएसम्म सुखी र समृद्ध नेपाल निर्माण गर्न नसकिने भएकाले विकृत बनेको शिक्षा प्रणाली सुधार गर्न सरकारको ध्यान जानुपर्ने बताउनुभयो ।

महर्षि अभियानका नेपाल हेर्ने निर्देशक राजा किङ्स्ली ब्रुक्सले जनसङ्ख्याको एक प्रतिशतलाई दैनिक दुईपटक ध्यान गराएर नेपाल पुरानो वैदिक परम्परामा फर्काउने अभियानमा साथ दिने प्रतिबद्धता जनाउनुभयो ।

March 3, 2019मा प्रकाशित

Leave a Reply

Your email address will not be published. Required fields are marked *