लण्डन, जेठ २८

बेलायत भ्रमणमा रहनुभएका प्रधानमन्त्री केपी शर्मा ओलीले आफेना बेलायती समकक्षी टेरिजा मेसँग भेटवार्ता अघि आन्दोलनरत गोर्खा समुदायलाई भेटेर उनीहरुको समस्या बुझ्नु भएको छ । आन्दोलनरत गोर्खा भूतपूर्व सैनिक संघ (गेसो), संयुक्त संत्याग्रह संघर्ष समिति लगायतका बिभिन्न गोर्खाका संस्थाका नेताहरुसँग भेटेर प्रधानमन्त्री ओलीले सो समुदायको समस्याको बारेमा जानकारी लिनुभएको हो ।

मंगलबार दिउँसो लन्डनमा बेलायती प्रधानमन्त्री मेलाई भेट्नु अघि प्रधानमन्त्री ओलीले गोर्खाहरुको समस्याको बिषयमा जानकारी लिनुभएको गेसोका सभापति कृष्णकुमार राईले जानकारी दिनुभयो । प्रधानमन्त्री ओलीसँगको भेटमा गेसो सभापति राईले गोर्खाहरुको समस्याको बारेमा जानकारी गराउनु भएको थियो ।

सभापति राईले बेलायत सरकार, नेपाल सरकार र गोर्खाहरु सम्मिलित प्राबिधिक समितिले तयार पारेको प्रतिवेदन अनुसार नै गोर्खाहरुको समस्या सम्बोधनको निम्ति बेलायती समकक्षीसँग अजेन्डा राख्नका लागि अनुरोध गर्नुभएको थियो । ‘प्राबिधिक समितिले तयार पारेको प्रतिवेदन अनुरुप नै गोरखाहरुको समस्या सम्बोधनको निम्ती यहाँले भेटवार्ताको क्रममा गम्भिरताको साथ कुरा उठाइदिनु हुनका लागि हामी अनुरोध गर्दछौं,’ प्रधानमन्त्री ओलीसँग सभापति राईको भनाई थियो ।

त्रिपक्षीय प्राविधिक समितिले सिफारिस गरे अनुसार गोरखाहरुको माग सम्बोधन होला भनेर ठुलो आशा र उत्साहका साथ व्यग्र प्रतिक्षामा रहेको बेला बेलायत सरकारले पूर्व प्रतिबद्धता विपरित एकतर्फी प्याकेज घोषणा गरेको भन्दै सभापति राईले दुईदेशबीच वार्ताको जरुरी रहेको तथ्यसहित पहलकदमीका लागि आग्रहसमेत गर्नुभयो ।

‘वार्ता समिति बनाएर वार्ताको माध्यमबाट त्रिपक्षीय प्राबिधिक समितिको सिफारिस अनुसार समस्या समधान गर्नुको साटो एक तर्फी रुपमा प्याकेज भन्दै केही प्रतिशत पेन्सन र सुबिधा बृद्धिको घोषणा गरिनु अत्यन्तै दुःखत थियो । न्याय पाउने आशामा रहेका गोरखाहरु फेरि एक पटक दुःखी बनेका छौं । सम्माननीय प्रधानमन्त्रीज्यूले पहल गरीदिनु हुन्छ भन्ने विश्वासमा छौं’ उहाँको भनाई थियो ।

संत्याग्रहका संयोजक ज्ञानराज राईले वार्ताको माध्यमबाट समस्या समधान होस् भन्ने आफूहरुको चाहना रहेको बताउनु भएको थियो । सवैको कुरासुनेपछि गोर्खाहरुको बारेमा गम्भीरताका साथ छलफल गर्ने जानकारी प्रधानमन्त्री ओलीले गराउनु भएको थियो । प्रधानमन्त्री ओलीले गोर्खाहरुको समस्या सम्बोधनको निम्ती दुई देशबीचमा वार्ता हुने जानकारीसमेत गराउनु भएको थियो ।